Goditje për Bayernin: Manuel Neuer mungon në Ligën e Kampionëve, Kompany zbulon zëvendësuesin

Giganti bavarez, Bayern Munich, do të duhet të bëjë pa shërbimet e kapitenit dhe portierit kryesor, Manuel Neuer, në sfidën e radhës në Ligën e Kampionëve kundër Vikingut. Gardiani veteran gjerman ka shfaqur probleme fizike në këmbë, çka ka detyruar stafin teknik të ndërmarrë masa të menjëhershme. Këtë mungesë të rëndësishme e ka konfirmuar zyrtarisht trajneri Vincent Kompany gjatë konferencës për shtyp para ndeshjes. Ai ka bërë të ditur se 40-vjeçari nuk ka mundur të stërvitet në seancat e fundit, pas barazimit 2-2 kundër Augsburgut në kuadër të Bundesliga-s. “Manuel nuk mund të stërvitet sot. Ka ndier diçka në këmbë. Kjo e përgjigjet shpejt pyetjen se kush do të jetë në portë nesër. Pas ndeshjes me Augsburgun dëgjuam se kishte ndier diçka. Nuk e dimë sa do të zgjasë, por meqë nuk mundi të stërvitej as dje dhe as sot, nuk ka kuptim të marrim rreziqe të panevojshme”, u deklarua trajneri belg. Tekniku i skuadrës nga Munichu ka theksuar se klubi nuk është i gatshëm të rrezikojë shëndetin e lojtarit, ndërsa koha e saktë e rikthimit të tij do të varet nga ecuria e rikuperimit në ditët në vijim. “Kur ndien diçka dhe gjendja nuk përmirësohet, në një moment e kupton se duhet të ndërmarrësh diçka. Nuk do të rrezikojmë nëse ai nuk ndihet plotësisht i gatshëm”, shtoi më tej Kompany. Megjithëse ky vendim vjen pas kritikave që Neuer mori për paraqitjen e tij në barazimin ndaj Augsburgut, drejtuesit dhe stafi teknik kanë insistuar se shkaku i vetëm i mungesës mbetet shqetësimi fizik dhe kujdesi për të shmangur dëmtime më të rënda. Në mungesë të kapitenit, porta e gjermanëve pritet t'i besohet portierit të ri, Jonas Urbig, i cili po dëshmon vlerat e tij dhe po fiton besimin e plotë të teknikut belg për ndeshjet e rëndësishme.