Të dy efektivët e Komisariatit Nr. 4 në kryeqytet përfundojnë në pranga, akuzohen për mitmarrje

Agjencia e Mbikëqyrjes Policore (AMP), në bashkëpunim të ngushtë me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, ka ndërmarrë një operacion që ka rezultuar me arrestimin në flagrancë të dy punonjësve të policisë. Efektivët, të cilët shërbenin në Komisariatin e Policisë Nr. 4 në kryeqytet, dyshohen se kanë kryer veprat penale të korrupsionit pasiv dhe shpërdorimit të detyrës në bashkëpunim, referuar neneve përkatëse të Kodit Penal. Në pranga kanë rënë dy efektivë të rinj, konkretisht shtetasi A. S., 20 vjeç, me gradën Inspektor dhe me detyrë trupë shërbimi në Patrullën e Përgjithshme, si dhe shtetasi Xh. F., 23 vjeç, po me gradën Inspektor dhe me detyrë trupë shërbimi në Patrullën e Përgjithshme pranë të njëjtit komisariat. Operacioni dhe ndalimi i tyre janë pasojë e një hetimi të nisur menjëherë pas kallëzimit të bërë nga një qytetar. Sipas të dhënave paraprake nga organet e drejtësisë, dy punonjësit e policisë dyshohet se i kanë kërkuar dhe marrë qytetarit shumën prej 20.000 lekësh, me qëllim që të mos e ndëshkonin atë për një shkelje të konstatuar në rregullat e qarkullimit rrugor. Ndërkohë, autoritetet bëjnë me dije se hetimet janë ende të hapur për të zbardhur plotësisht rrethanat e ngjarjes dhe për të verifikuar nëse ka persona të tjerë të përfshirë në këtë skandal korruptiv.