Pakënaqësi në Prishtinë: OVL-UÇK paralajmëron protesta nëse bllokohet zbatimi i ligjit për Specialen

Organizata e Veteranëve të Luftës së UÇK-së ka reaguar ndaj qëndrimeve të Komisioneres Evropiane për Zgjerim, Marta Kos, duke theksuar se ajo duhet të fokusohet te padrejtësitë e pretenduara në procesin gjyqësor ndaj ish-krerëve të UÇK-së në Hagë, e jo tek nismat legjislative të deputetëve kosovarë. Sipas kësaj organizate, zyrtarja e lartë evropiane duhet të adresojë shqetësimet rreth shkeljes së të drejtave të njeriut gjatë këtij gjykimi, në vend që të komentojë vendimet e Kuvendit të Kosovës. Në reagimin zyrtar, OVL-UÇK ka sjellë në vëmendje vendimin e Dhomës së Specializuar të Gjykatës Kushtetuese (KSC-CC-2022, paragrafi 83), ku vetë institucioni ka konfirmuar autoritetin e Kuvendit për të përcaktuar kufijtë e juridiksionit të Dhomave të Specializuara përmes aktpaneve ligjore, hap ky që tashmë është ndërmarrë. Organizata ka qenë e prerë se ky ligj duhet të jetë plotësisht i zbatueshëm. Në rast se zvarritet apo nuk nis zbatimi i tij pas hyrjes në fuqi, veteranët dhe qytetarët paralajmërojnë rikthimin e protestave masive para zyrave të institucioneve të Bashkimit Evropian në vend. Gjithashtu, në deklaratë thuhet se Kuvendi mbetet organi më i lartë sovran që mishëron vullnetin e qytetarëve, ndaj çfarëdolloj presioni apo ndërhyrje e jashtme në funksionimin e tij është e papranueshme. "Komisionerja Marta Kos duhet të kërkojë drejtësi të paanshme dhe respektim të të drejtave të njeriut, e jo t’u tregojë deputetëve të Kosovës se si duhet ta ushtrojnë mandatin e tyre", përfundon reagimi i OVL-UÇK-së.