Nisin punimet për autostradën Bukojçan–Kërçovë, Bekim Sali: Korridori 8 po merr jetë

Zëvendëskryeministri i parë, Bekim Sali, ka mirëpritur fillimin e punimeve ndërtimore për autostradën në aksin Bukojçan–Kërçovë, duke e konsideruar këtë nismë si një zhvillim kyç drejt finalizimit të Korridorit VIII. Sipas zyrtarit të lartë qeveritar, këto ndërhyrje në infrastrukturë kanë për qëllim modernizimin e rrjetit rrugor, ngritjen e standardeve të sigurisë gjatë lëvizjes dhe stimulimin e klimës ekonomike për të joshur investitorë të rinj. "Me nisjen e punimeve për autostradën Bukojçan–Kërçovë, një tjetër projekt i rëndësishëm infrastrukturor po hyn në fazën e realizimit konkret. Qeveria po avancon me investime që synojnë lidhje më të mira rrugore, udhëtim më të sigurt dhe më të lehtë, si dhe kushte më të favorshme për zhvillimin ekonomik dhe tërheqjen e investimeve", ka theksuar ai. Në mesazhin e tij të shpërndarë në platformat sociale, Sali ka shtuar se ky korridor mbetet arterie vitale për Maqedoninë e Veriut dhe zonën më të gjerë. "Korridori VIII është një lidhje strategjike e Maqedonisë së Veriut me rajonin, që krijon mundësi të reja për qytetarët dhe bizneset. Nga premtimet shumëvjeçare te projektet që marrin formë në terren, infrastruktura është investim në zhvillimin dhe të ardhmen e vendit", u shpreh ai.