Kamberi denoncon standardet e dyfishta të Beogradit: Miliona euro pa transparencë për serbët në Kosovë, bllokadë për fondet e shqiptarëve të Luginës

Deputeti i vetëm shqiptar në Kuvendin e Serbisë, Shaip Kamberi, ka hedhur akuza të ashpra ndaj mungesës së transparencës financiare për qindra milionë euro që shteti serb i alokon çdo vit për serbët në Kosovë, ndërkohë që, sipas tij, Beogradi po mban të bllokuara mjetet e parashikuara për mbështetjen e shqiptarëve në Luginën e Preshevës. Këto deklarata janë bërë përmes një reagimi zyrtar të publikuar nga Koalicioni Shqiptar, ku Kamberi ka kërkuar llogaridhënie të plotë për fondet publike të Serbisë, si dhe zhbllokimin e menjëhershëm të mjeteve që Qeveria e Kosovës i ka ndarë për iniciativa konkrete në dobi të komunitetit shqiptar në këtë rajon. Në argumentimin e tij, politikani shqiptar i është rikthyer deklaratës së presidentit serb, Aleksandar Vuçiq, të dhënë më 13 shtator 2022 në Kuvendin e Serbisë, ku kreu i shtetit kishte pranuar se Serbia derdh nga 700 deri në 820 milionë euro në vit për Kosovën. Sipas Kamberit, pavarësisht shifrave marramendëse të përmendura zyrtarisht, ka një paqartësi totale rreth destinacionit final të këtyre parave dhe autorëve përgjegjës për menaxhimin e tyre. “Në Kuvendin e Serbisë, A. Vuçiq kishte deklaruar se Serbia ndan për ‘çdo vit 700-820 milionë’ euro për Kosovën pa theksuar se kujt i paguhen këto para dhe kush i kontrollon. U pranua se shuma e saktë nuk dihej dhe se jo të gjitha mjetet kalonin përmes të ashtuquajturës ‘Zyrë për Kosovën’”, ka shkruar Kamberi në reagimin e tij. Më tej, ai ka ngritur dyshime të forta mbi fatin e pjesës tjetër të buxhetit, duke u nisur nga përllogaritjet e deritanishme për shumat që kalojnë përmes Zyrës për Kosovën dhe dikastereve të tjera qeveritare në Serbi. “Nëse vlerësimet për 100-180 milionë euro për Zyrën për Kosovën dhe rreth 100 milionë përmes ministrive të tjera janë të sakta, ku përfundojnë qindra milionët e mbetur? Kush i përfiton dhe kujt i jep llogari?”, ka shtruar pyetjen deputeti. Në anën tjetër të medaljes, Kamberi ka vënë në dukje pengesat që Serbia po u vë fondeve të dërguara nga Kosova për shqiptarët e Luginës së Preshevës, të cilat përfshijnë projekte dhe programe me rëndësi jetike për përmirësimin e jetës së qytetarëve atje. Bëhet fjalë konkretisht për 129 projekte dhe katër programe thelbësore, ku hyjnë sigurimi i librave shkollorë falas për nxënësit, mundësitë e praktikës profesionale, garantimi i funksionimit të Këshillit Kombëtar Shqiptar, si dhe nismat e ndryshme të avokimit. Duke vënë në peshore qasjen e autoritetit qendror ndaj dy rajoneve, Kamberi ka evidentuar një kontrast drastik mes mënyrës se afrimit të financave për serbët në Kosovë dhe shtypjes ekonomike ndaj shqiptarëve të Luginës. “Dallimi është i qartë: për qindra miliona euro kërkohet besim, pa transparencë të plotë publike. Për librat e fëmijëve shqiptarë dhe projektet konkrete për komunitetin shqiptar vendoset bllokadë”, ka theksuar ai. Në përmbyllje të reagimit të tij, përfaqësuesi politik i shqiptarëve të Luginës ka kërkuar transparencë rigoroze për çdo cent të taksapaguesve dhe eliminimin e menjëhershëm të barrierave burokratike e politike për fondet e destinuara për Luginën e Preshevës. “Të drejtat e pakicave nuk mund të varen nga interesat politike të pushtetit. Llogaritë të bëhen publike. Mjetet të zhbllokohen. Barazia të zbatohet”, ka përfunduar Shaip Kamberi.