Politikani kroat: Kosova është shtet i pavarur, në Serbi sundon mentaliteti çetnik

Nënkryetari i partisë politike kroate Dom i nacionalno okupljanje (DOMiNO) dhe deputet në Kuvendin e Kroacisë, Igor Peternel, ka dhënë një deklaratë të prerë duke theksuar se Kosova është shtet i pavarur dhe sovran, ndërkohë që ka lëshuar kritika të rrepta në drejtim të skenës politike dhe udhëheqësisë në Serbi. Peternel ka bërë thirrje që realiteti i Kosovës si shtet të pranohet botërisht, ndërsa ka vënë në shënjestër të kritikave të tij luftën e brendshme mes rrymave nacionaliste në shtetin serb. “Kosova është shtet sovran dhe i pavarur!”, ka theksuar ai gjatë prononcimit të tij, duke shfaqur hapur qëndrimin e tij rreth kësaj çështjeje. Duke analizuar situatën aktuale politike në Beograd, deputeti kroat ka përdorur tone të ashpra për të komentuar dinamikat dhe rivalitetet mes figurave kryesore politike atje. “Në Serbi ekziston çetnikizëm përballë një çetnikizmi edhe më të madh – të gjithë atje janë njësoj!”, ka përfunduar Peternel. Krahas mbështetjes për shtetësinë e Kosovës dhe kritikave ndaj fqinjit verior, zyrtari i lartë i partisë DOMiNO ka kërkuar që diplomacia kroate të adoptojë një qasje më të fortë dhe pa lëshime karshi Serbisë. Ai ka nënvizuar se autoritetet në Zagreb duhet t'i japin përgjigje të menjëhershme dhe të qartë çdo provokimi nga Beogradi, duke mos lënë vend për dilema rreth pozicionit të Kroacisë në raport me zhvillimet dhe dinamikat rajonale.