Kryeministri Rama pret në takim ministrin e Jashtëm të Izraelit, Gideon Sa’ar lëvdata të forta për Shqipërinë

Kryeministri i Shqipërisë, Edi Rama, ka zhvilluar sot një takim zyrtar me ministrin e Jashtëm të Izraelit, Gideon Sa’ar, i cili ndodhet për vizitë në Tiranë. Pas takimit, kryediplomati izraelit ka përdorur rrjetin social X për të ndarë përshtypjet e tij, duke e cilësuar kreun e qeverisë shqiptare si një ndër liderët më etikë dhe më të shquar në shkallë globale sot, i cili udhëheq prej 13 vitesh vendin e tij. Gjatë bisedës, e cila u cilësua e thellë dhe përfshijëse, u trajtuan tema që lidhen me forcimin e mëtejshëm të bashkëpunimit dypalësh, si dhe zhvillimet e fundit gjeopolitike në rajonin e Ballkanit Perëndimor dhe në Lindjen e Mesme. Sa’ar shprehu mirënjohjen e thellë për mbështetjen e vazhdueshme që Shqipëria i ka dhënë Izraelit, duke e quajtur Ramën një mik të vërtetë që nuk është tërhequr në periudha sfiduese dhe një zë të fortë e parimor përballë terrorizmit dhe antisemitizmit në arenën ndërkombëtare.