Kërcënimi nga OVL-UÇK: Protesta gjithëpërfshirëse nëse injorohet ligji për Gjykatën Speciale

Organizata e Veteranëve të Luftës së Ushtrisë Çlirimtare të Kosovës ka lëshuar një reagim të ashpër ndaj Komisioneres Evropiane për Zgjerim, Marta Kos, pasi kjo e fundit shpreh kundërshtimin e saj ndaj ndryshimeve ligjore që lidhen me Gjykatën Speciale. Sipas kësaj organizate, zyrtarja e lartë evropiane duhet të fokusohet te shkeljet dhe padrejtësitë që po ndodhin në Hagë ndaj ish-krerëve të UÇK-së, në vend që të komentojë dhe të shqetësohet për vendimet dhe vendimmarrjen e Kuvendit të Kosovës. OVL-UÇK ka theksuar se Marta Kos dhe institucionet e Bashkimit Evropian nuk duhet të mbyllin sytë para shkeljeve të të drejtave të njeriut në këtë proces gjyqësor, shkelje të cilat janë ngritur publikisht edhe nga Komiteti i Avokatëve për të Drejtat e Njeriut i Anglisë dhe Uellsit (BHRC). Gjithashtu, në reagim përmendet vendimi i Dhomës së Specializuar të Gjykatës Kushtetuese (KSC-CC-2022, paragrafi 83), i cili konfirmon të drejtën legjitime të Kuvendit të Kosovës për të vendosur kufizime në juridiksionin e Dhomave të Specializuara përmes rrugëve ligjore, veprim ky që tashmë është ndërmarrë nga legjislativi kosovar. Organizata ka lëshuar një paralajmërim të prerë se ky ligj duhet të zbatohet në tërësi. Në rast se nuk nis zbatuar pas hyrjes në fuqi, veteranët dhe qytetarët e vendit do të organizojnë protesta masive para zyrave të institucioneve të BE-së në Kosovë. Në fund, OVL-UÇK riafirmon se Kuvendi mbetet institucioni më i lartë sovran që pasqyron vullnetin e popullit, ndaj çdo lloj presioni apo ndërhyrje e jashtme në ushtrimin e detyrave kushtetuese të deputetëve është absolutisht e papranueshme.