Tragjedia në Ferizaj: Vihet në pranga 31-vjeçari pas vdekjes së 54-vjeçarit në vendin e punës

Autoritetet policore në Ferizaj kanë ndaluar për 48 orë një 31-vjeçar, i cili dyshohet se është i përfshirë në ngjarjen tragjike të kësaj të hëne, ku një punëtor 54-vjeçar humbi jetën në një kantier ndërtimi. Sipas hetimeve paraprake, incidenti fatal ndodhi gjatë zhvillimit të punimeve, kur viktima dyshohet se ka rënë nga kati përdhes në pjesën e bodrumit të objektit. Zëdhënësi i Policisë së Kosovës për rajonin e Ferizajt, Kanun Veseli, ka bërë të ditur se ndaj të dyshuarit është caktuar masa e ndalimit policor nën dyshimin për kryerjen e veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”. “Viktima është M.M., 54 vjeç, ndërsa B.T., 31 vjeç, është ndaluar për 48 orë nën dyshimin për veprën penale ‘Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’”, ka deklaruar ai.