Kurti e pranon në takim lamtumirës gjeneralmajorin Özkan Ulutaş: Vëmendje sigurisë dhe integrimit në NATO

Kryeministri i vendit, Albin Kurti, ka zhvilluar sot një takim lamtumirës me komandantin e deritanishëm të KFOR-it, gjeneralmajorin Özkan Ulutaş, ku është diskutuar mbi partneritetin dhe bashkëpunimin ndërmjet ekzekutivit kosovar dhe misionit paqeruajtës të NATO-s. Përmes një reagimi publik, kreu i qeverisë e ka cilësuar bashkëpunimin me Ulutaş gjatë dy mandateve të tij si tejet konstruktiv, duke shtuar se ai po largohet nga Kosova si një mik i vërtetë i vendit. Gjatë bisedës, siç ka bërë të ditur Kurti, fokus i veçantë i është kushtuar perspektivës euroatlantike të Kosovës dhe synimit për anëtarësim në aleancën e NATO-s, si dhe situatës aktuale politike e të sigurisë si brenda vendit ashtu edhe në hapësirën rajonale. Po ashtu, palët kanë trajtuar temat që lidhen me zhvillimin e kapaciteteve operacionale të Forcës së Sigurisë së Kosovës dhe Policisë së Kosovës, duke theksuar rëndësinë e vazhdimësisë së koordinimit të ngushtë ndërmjet institucioneve shtetërore dhe trupave të KFOR-it.