Çollaku: Brukseli po tregohet i butë me Beogradin, Radoiçiqi vazhdon të jetë krahu i djathtë i Vuçiqit

Eksperti i sigurisë, Fatmir Çollaku, ka drejtuar kritika të ashpra ndaj qasjes së Bashkimit Evropian në raport me Kosovën dhe Serbinë, duke e cilësuar trajtimin e tyre si thellësisht të pabarabartë. Gjatë një paraqitjeje në emisionin “Ditari”, ai ka analizuar zhvillimet e fundit politikë, duke u ndalur te lidhjet e vazhdueshme të Milan Radoiçiqit me strukturat e pushtetit në Serbi dhe me familjen e ish-presidentit Aleksandar Vuçiq. Sipas Çollakut, Brukseli ka aplikuar vazhdimisht standarde të dyfishta në dialog, duke e penalizuar Kosovën me masa të rënda, ndërkohë që Serbia është toleruar dhe përkëdhelur në çdo hap të procesit të negociatave. Ai theksoi se kjo diplomaci e pabalancuar vazhdon të shfaqet edhe në periudhën aktuale. “Fatkeqësisht, duhet të themi atë që e dimë të gjithë: BE-ja ka pasur një qasje krejt ndryshe ndaj Kosovës dhe krejt ndryshe ndaj Serbisë, në favor të Serbisë. Ka vepruar me standarde të dyfishta. Nëse kthehemi pak kohë më herët, kur ne kishim sanksione, neve na vunë sanksione ekonomike, ndërsa Serbia, si një fëmijë i llastuar, në të gjitha etapat e proceseve dhe dialogut që po zgjasin, është përkëdhelur. Ngjashëm po vazhdohet edhe tani me një qasje të tillë”, ka deklaruar Çollaku në Tëvë1. Duke e sjellë në vëmendje sulmin e armatosur në Banjskë, njohësi i sigurisë ka vënë në pah mungesën totale të vullnetit nga ana e Beogradit për të adresuar drejtësisht këtë rast të rëndë, pavarësisht se përgjegjësia është pranuar hapur. “Nuk ka nevojë të kemi shumë argumente, e kemi një argument të vetëm: rastin e Banjskës. Pranimi i fajësisë nga Radoiçiqi për një vepër të tillë, e cila është vepër terroriste, dhe asgjë nuk bëhet, as nuk procedohet në Serbi ndaj Radoiçiqit. Përkundrazi, përcillet ose ruhet me përcjellje zyrtare nga policia e Serbisë në takimet publike dhe ende shihet publikisht si njeri i afërt i Vuçiqit, me afërsi edhe me djalin e tij”, ka shtuar ai. Në përmbyllje, Çollaku ka përsëritur se mungesa e sanksioneve dhe e trysnisë ndërkombëtare ndaj shtetit serb dëshmon qartë se BE-ja nuk po ndjek një linjë të drejtë në ndërtimin e paqes dhe stabilitetit në rajon. “Serbia nuk vuan për BE-në, sepse nuk ka sanksione ndaj saj dhe nuk ka trysni”, ka përfunduar Çollaku.