Bashkëpunimi ushtarak dhe blerja e helikopterëve Black Hawk në fokus të takimit Maqedonci – Whitaker

Ministri i Mbrojtjes, Ejup Maqedonci, ka zhvilluar një takim me Përfaqësuesin e Përhershëm të SHBA-së në NATO, ambasadorin Matthew Whitaker, në kuadër të Forumit të Sigurisë të Varshavës 2026. Sipas njoftimit zyrtar të dikasterit të mbrojtjes, në qendër të bisedimeve ishte forcimi i partneritetit dypalësh në sektorin e mbrojtjes dhe bashkërendimi i veprimeve për temat me interes të përbashkët. Gjatë këtij bashkëbisedimi, ministri Maqedonci ka falënderuar SHBA-në për ndihmën e deritanishme dhënë institucioneve të mbrojtjes dhe Forcës së Sigurisë së Kosovës (FSK). Ai vuri në pah peshën e veçantë të bashkëpunimit mbi 15-vjeçar me Gardën Kombëtare të Iowa-s nëpërmjet Programit të Partneritetit Shtetëror, i cili po ndihmon ngritjen e kapaciteteve përmes stërvitjeve, trajnimeve dhe shkëmbimit të eksperiencave. Nga ana e tij, ambasadori Whitaker rikonfirmoi mbështetjen amerikane për aspiratat e Kosovës drejt anëtarësimit në NATO, si dhe për zhvillimin e mëtutjeshëm të kapaciteteve mbrojtëse të vendit. Ministria e Mbrojtjes bëri të ditur se partneriteti mes dy shteteve po shtrihet edhe në fushën e prokurimeve ushtarake dhe industrisë së mbrojtjes. Gjatë takimit u shqyrtua e ecuria e zhvillimit të kapaciteteve, duke përfshirë armatimet e siguruara nga SHBA-ja dhe hapat e ndërmarrë për sigurimin e helikopterëve Black Hawk. Po ashtu, u vu theksi te mbështetja për rritjen e industrisë vendore të mbrojtjes. Kreu i Mbrojtjes kërkoi sërish mbështetje për integrimin e Kosovës në strukturat e NATO-s dhe zgjerimin e mundësive për pjesëmarrjen e ushtarakëve kosovarë në shkollat dhe programet e Aleancës. Në këtë linjë, u bisedua edhe për intensifikimin e bashkëpunimit me NATO-n sa i përket pranisë dhe optimizimit të KFOR-it, si dhe hapjes dhe normalizimit të hapësirës ajrore të Kosovës. Maqedonci shfaqi gatishmërinë për të shqyrtuar mundësitë e bashkëpunimit në bazë të ndarjes së përgjegjësive, duke përmendur kampin Bondsteel dhe Aeroportin e Gjakovës. Ai gjithashtu theksoi rëndësinë e angazhimit të Kosovës në Forcën Ndërkombëtare Stabilizuese në Gaza, si dëshmi e përkushtimit të vendit për të mbajtur përgjegjësi në ruajtjen e paqes dhe sigurisë globale. Në mbyllje të takimit, ministri Maqedonci i ka drejtuar një ftesë zyrtare ambasadorit Whitaker për të vizituar Kosovën, me qëllim vazhdimin e dialogut dhe thellimin e mëtejshëm të bashkëpunimit. Aleanca me Shtetet e Bashkuara mbetet shtyllë kurrizore për ngritjen e kapaciteteve ushtarake dhe për të ardhmen euroatlantike të Kosovës.