Tragjedia në Pogragjë të Gjilanit: Detajet rrëqethëse se si nëna gjeti djalin e pajetë në dhomë

Një e diel e zezë ka pllakosur familjen Arifi nga fshati Pogragjë i Gjilanit, pas një ngjarjeje tronditëse që dyshohet se ka ndodhur në gjirin e kësaj familjeje. 53-vjeçari Remzi Arifi dyshohet se i ka marrë jetën djalit të tij 29-vjeçar, për motive që ende mbeten plotësisht misteriozë. Ngjarja e rëndë ka ndodhur brenda hapësirave të shtëpisë së tyre, ku u dëgjuan të shtënat fatale me armë zjarri drejt të riut. Sipas informacioneve nga burime të afërta me familjen, skena e krimit është zbuluar nga vetë nëna e viktimës, e cila ishte dëshmitare e momenteve të para të tmerrit pasi dëgjoi krismat. Ajo ka treguar se ka dëgjuar dy të shtëna dhe menjëherë pas kësaj ka parë bashkëshortin e saj duke u larguar me shpejtësi me një automjet të tipit Suzuki. Kur ka hyrë brenda shtëpisë, nëna e ka gjetur të birin të vrarë, trupi i të cilit ishte mbuluar me një qebe. Ndërkohë, organet e rendit kanë bërë të ditur se autoritetet policore, në bashkëpunim të ngushtë me Prokurorinë e Shtetit, janë vënë në ndjekje intensive të autorit të dyshuar. Sipas të dhënave të deritanishme, automjeti me të cilin ai është larguar është lokalizuar dhe gjetur në fshatin Sllubicë, në zonën juglindore të komunës së Gjilanit.