Çitaku nga PDK: Dialog i domosdoshëm me BE-në për Dhomat e Specializuara, s’kemi synim t’i shmangemi drejtësisë

Nënkryetarja e Kuvendit të Kosovës nga radhët e Partisë Demokratike të Kosovës (PDK), Vlora Çitaku, ka vënë në pah se vendi ynë po kalon nëpër dy faza tejet vendimtare, të cilat lidhen me shqyrtimin e Apelit në Hagë dhe integrimin në Këshillin e Evropës. Ajo ka theksuar domosdoshmërinë e hapjes së një dialogu thelbësor me aleatët e Bashkimit Evropian lidhur me dispozitat e Ligjit për Dhomat e Specializuara, duke kërkuar mirëkuptim për qëndrimet e institucioneve tona. "Dy gjëra janë të rëndësisë së veçantë, procesi i Apelit në Hagë dhe Këshilli i Evropës. Është normale që ndonjëherë me miqtë të kemi mospajtime, por besoj që do të kemi kohë të bisedojmë edhe me përfaqësuesit e BE-së dhe t’ua sqarojmë vullnetin politik të deputetëve të zgjedhur të Kuvendit. Kosova me ligj, dhe me vullnet kërkon drejtësi. Nuk po kërkojmë të i ikim drejtësisë, por po synojmë që procesin e deformuar dhe devijuar, ta kthejmë në binarë të drejtë. Kosova është partner, partnerët diskutojnë, debatojnë, por jam e bindur që në fund do të ketë pajtueshmëri", u shpreh Çitaku gjatë deklaratës së saj.