Skandali me videot intime, Blerina Matraku thyen heshtjen: Si ia dhashë 10 mijë euro Adi Hilës

Këngëtarja e njohur Blerina Matraku ka thyer heshtjen përmes një rrëfimi ekskluziv në emisionin “Goca dhe Gra”, duke iu përgjigjur situatës së bujshme që e vuri në qendër të vëmendjes për shkak të përfshirjes së saj në videot intime që përfshijnë kompozitorin Adi Hila. Gjatë paraqitjes së saj, ajo sqaroi se qëllimi i saj ishte të zbardhte të vërtetën, duke nënvizuar se realiteti pas kësaj ngjarjeje është krejtësisht ndryshe nga ajo që është përfolur në publik. Ajo konfirmoi se i ka dorëzuar shumën prej 10 mijë eurosh për realizimin e një albumi muzikor dhe se nuk ka asnjë detyrim apo borxh të prapambetur financiar lidhur me projektet e tyre. Duke evokuar fillimet e bashkëpunimit të tyre profesional, Matraku tregoi se iu afrua kompozitorit pasi e kishte kërkuar për muaj të tërë, e motivuar nga reputacioni dhe serioziteti që ai gëzonte në tregun muzikor në atë periudhë. Sipas rrëfimit të saj, në vitin 2007 ajo kontaktoi Adi Hilën për t'i besuar krijimin e një albumi, për të cilin pagoi tarifën prej 10 mijë eurosh. Këngëtarja shpjegoi se kjo shumë erdhi si rezultat i kursimeve të saj nga angazhimet në evente festive, dasma dhe puna e saj si stjuardesë, ndërsa theksoi se për mbledhjen e fondeve kishte marrë mbështetje edhe nga miqtë e saj të afërt. “Ke një person të zhveshur nga çdo lloj morali dhe, edhe pse nuk e kam merituar deri në këtë pikë, duke mbajtur përgjegjësitë e mia, ke përballë vetes një person të vdekur që po frymon, e kryqëzuar. Sot jam këtu për të thënë të vërtetën time, për të mbajtur peshën që më takon dhe për të ndarë me ju një pjesë të historisë, me të cilën njerëzit mund të kuptojnë që ‘prit se ky njeri nuk është fajtor aq sa e kanë fajësuar’. Ne të gjithë bëjmë gabime, ose na ngelet një situatë në dorë që ngelem fajtor edhe nëse nuk jemi. Unë jam gati që të mos dalë asgjë tjetër dhe të mbroj vetëm timen, gjërat nuk janë ashtu siç duken”, u shpreh ajo ndër të tjera. Më tej, ajo shtoi: “Mund të them që kompozitorin Adi Hilën e kam kërkuar me muaj me radhë për të bashkëpunuar, në sajë të profesionalizmit dhe seriozitetit që ai kishte, për emrin që kishte si kompozitor, në vitin 2007. Ai ishte njeri shumë serioz, kur u takova, me të cilin unë mund të bashkëpunoja gjatë. I kërkova një album dhe e pagova me 10 mijë euro, për të cilat unë ato lekë i kam kursyer me eventet, dasmat dhe punë si stjuardesë që bëja në atë kohë; më kanë ndihmuar edhe miq të mi, sepse ishin shumë lekë për mua. I mblodha. Nuk i kam absolutisht asnjë lloj borxhi ndaj këngëve të mia dhe as nuk më ka. Menduam që të merrnim pjesë në kompeticione të ndryshme me këto këngë. E kam të vështirë që të flas për jetën personale me të, duke qenë se bashkëpunon gjatë me një person, kemi bashkëpunuar 4 vite”.