Neutralizohet atentati në Lezhë: Vihen në pranga dy persona të dyshuar si vrasës me pagesë

Forcat e rendit kanë ndërhyrë me sukses gjatë ditës së djeshme në qarkun e Lezhës, duke vënë në pranga tre persona të armatosur që dyshohet se po përgatiteshin për të ekzekutuar një krim të rëndë. Sipas të dhënave paraprake nga grupi hetimor, 38-vjeçari Vinçesk Piroli dhe 34-vjeçari Kristian Ymeri dyshohet se funksiononin si vrasës me pagesë, ndërsa nuk përjashtohet mundësia e përfshirjes së tyre në ngjarje të tjera të kaluara kriminale. Deri më tani, identiteti i shënjestrës mbetet i panjohur, pasi të dyshuarit kanë refuzuar të bashkëpunojnë dhe kanë heshtur para autoriteteve policore. Operacioni për kapjen e tyre, ku u vu në pranga edhe Elden Tarja, erdhi pas një informacioni sekret të siguruar nga strukturat e Policisë së Lezhës. Autoritetet i kishin mbajtur në vëzhgim të rreptë për disa ditë me radhë, duke ndjekur çdo lëvizje të tyre derisa u krijuan kushtet për ndërhyrje në momentin kritik. Dy të dyshuarit ishin duke qarkulluar në aksin e vjetër Pllanë–Lezhë, ku mendohet se do të çonin në fund planin kriminal, por ndërhyrja e shpejtë e bluve prishi çdo skenar të tyre. Finalizimi i operacionit të koduar “Detajet” u krye në rrugën Gjadër–Barbullush, në drejtim të Shkodrës, ku policia bëri të mundur bllokimin e automjetit tip “Volkswagen” me të cilin udhëtonin autorët e dyshuar.