Nga paraqitja e shkëlqyer me Kombëtaren te zhgënjimi në Angli: Futbollisti kuqezi merr vendimin e papritur nga klubi

Anis Mehmeti ka qenë një nga figurat kyçe të Përfaqësueses së Shqipërisë gjatë katër sfidave të fundit të vlefshme për Ligën e Kombeve. Sulmuesi anësor ka konfirmuar formë të mirë fizike, duke u aktivizuar në të gjitha takimet e zhvilluara përgjatë dy javëve të shkuara, madje duke lënë gjurmë edhe me një gol të shënuar në ndeshjen si mysafir ndaj San Marinos. Megjithatë, kontrast i madh vërehet mes paraqitjeve të tij nën fanellën kuqezi dhe statusit aktual në futbollin anglez. Pavarësisht përshtypjeve pozitive që la në arenën ndërkombëtare, situata e 25-vjeçarit te skuadra e Ipsuiçit mbetet e pandryshuar dhe tejet e vështirë. Konfirmimi i kësaj periudhe jo të favorshme erdhi edhe në sfidën e sotme në Premier Ligë kundër Fullhemit. Emri i Mehmetit nuk figuronte as në listën e lojtarëve të ftuar për këtë përballje, pasi trajneri Geri O’Nill ka vendosur të mos e përfshijë atë në planet e tij aktuale. Statistikat për këtë edicion konfirmojnë hapësirat e pakta për shqiptarin, i cili deri më tani është aktivizuar vetëm në sfidën e Kupës së Ligës kundër Arsenalit — takim ku Ipsuiçi u mposht me rezultatin 4-2, ndërsa Mehmeti arriti të shënonte një gol.