Valë e re e gripit sezonal në vend, vonohet nisja e fushatës së vaksinimit

Stina e vjeshtës sjell tradicionalisht një rritje të ndjeshme të infektimeve me gripin sezonal. Megjithatë, këtë vit procesi i imunizimit në Kosovë do të përballet me shtyrje, pasi dërgesa e vaksinave nuk ka mbërritur ende për shkak të sfidave globale në prodhim. Deri në nisjen e vaksinimit, ekspertët u bëjnë thirrje qytetarëve që të tregojnë kujdes të shtuar për shëndetin e tyre, ndërkohë që numri i rasteve vijon të jetë në rritje. Prej hyrjes në stinën e vjeshtës, institucionet shëndetësore primare po përballen me një fluks të lartë qytetarësh që kërkojnë ndihmë mjekësore. Vetëm në Qendrën e Mjekësisë Familjare në lagjen Dardani, çdo ditë trajtohen deri në 200 pacientë, një pjesë e konsiderueshme e të cilëve shfaqin shenja klinike të gripit. Specialistja e mjekësisë familjare, Nesrije Paqarada, bën të ditur se simptomat po përfshijnë të gjitha grupmoshat, duke filluar nga fëmijët e vegjël e deri te moshat e thyera. Ajo thekson se imunizimi mbetet mburoja më e fortë parandaluese ndaj këtij virusi. "Vaksinimi kundër gripit gjithmonë ka qenë më efikas, prej viteve kur ne e përdorim, e shohim që numri i të sëmurëve është më i vogël. Kategoritë të cilat mund ta marrin këtë vaksinë janë kryesisht të moshuarit, por edhe të rinjtë ose moshat e tjera që kanë probleme shëndetësore, në mënyrë që të mos u komplikohet sëmundja nëse preken edhe nga gripi", ka deklaruar ajo. Edhe pse fushata e vaksinimit ishte planifikuar të niste në javën e parë të tetorit, ajo nuk do të mund të realizohet sipas afateve paraprake, pasi dozat nuk kanë arritur ende në territorin e Kosovës. Sipas Institutit të Shëndetësisë Publike, dërgesa e vaksinave kundër gripit sezonal për periudhën 2026/2027 pritet të bëhet më 21 tetor. Vonesa vjen si pasojë e ndryshimeve në procesin ndërkombëtar të prodhimit, të cilat kanë prekur afatet e furnizimit në shkallë globale, përfshirë edhe vendin tonë. Derisa doza e parë e vaksinave të jetë e disponueshme, banorët po mundohen të mbrohen përmes masave vetjake parandaluese. "Po, ne zakonisht ushqehemi pak a shumë rregullisht. Kur është ftohtë ose nxehtë, i koordinojmë daljet, se kemi kohë si pensionistë. I përdorim çajrat dhe kujdesemi për veten, aq sa mundemi", u shpreh një nga qytetarët. "I marrim rregullisht vaksinat dhe ua rekomondaj të gjithëve që ta marrin vaksinën, sepse me të vërtetë janë shumë të dobishme", shtoi një qytetar tjetër. Për të parandaluar përhapjen e infeksionit, mjekët u rekomandojnë personave me simptoma të izolohen brenda rrethit familjar. Gjithashtu, këshillohet mbajtja e higjienës personale, përdorimi i maskave mbrojtëse, marrja e sasive të mjaftueshme të lëngjeve dhe shmangia e vendeve me grumbullime të mëdha njerëzish.