Agim Bahtiri kërcënon me padi: Kërkim falje publike ose do t’ju çoj në gjykatë për shpifje

Deputeti i Lëvizjes Vetëvendosje, Agim Bahtiri, ka reaguar ashpër ndaj një artikulli investigativ ku pretendohej se ai gjendet nën hetim, duke e cilësuar këtë si një shpifje të ulët që synon dëmtimin e integritetit të tij. Bahtiri ka mohuar çdo pretendim për keqpërdorim të detyrës zyrtare gjatë karrierës së tij politike, duke i lënë afat gazetarit Visar Duriqi dhe redaksisë deri më 12 tetor për të lëshuar një falje publike. Në rast të kundërt, ai ka bërë të ditur se të hënën do të nisë procedurat ligjore përmes angazhimit të një avokati për padi për shpifje. Sipas politikanit mitrovicas, të gjitha shpenzimet e kontestuara janë të mbështetura dhe të verifikuara në dokumentacion zyrtar, përfshirë edhe çështjen e fondeve për banesën e familjes së Selver Haradinaj, e cila sipas tij është paguar që në vitin 2012 nga fondi përkatës me vlerë 26,071 euro, një vit para se ai të merrte drejtimin e komunës. Duke theksuar se gjatë tetë viteve të mandatit si kryetar komunë ka hequr dorë nga paga e tij dhe ka investuar mjete personale për çështje bamirësie, Bahtiri është zotuar se dëmshpërblimin që synon të fitojë nga kjo betejë gjyqësore do ta orientojë ekskluzivisht në ndihmë të studentëve dhe personave në nevojë.