Ekzekutivi i Kosovës: Lidhja e Radoiçiqit me familjen Vuçiq dëshmon se Beogradi fshihet pas agresionit në Banjskë

Pjesëmarrja e Milan Radoiçiqit në një tubim elektoral të organizuar nga subjekti politik i udhëhequr dikur nga Aleksandar Vuçiq, përbën dëshminë e radhës se autoritetet zyrtare të Serbisë kanë planifikuar, financuar dhe koordinuar sulmin e armatosur në Banjskë të Zveçanit. Ky qëndrim është bërë i ditur nga Qeveria e Kosovës, e cila ka theksuar se ngjarja e shtatorit të vitit 2023, ku mbeti i vrarë një zyrtar i Policisë së Kosovës, mban vulën e shtetit serb, ndërkohë që vetë Radoiçiq ka marrë përgjegjësinë për organizimin e atij sulmi të dhunshëm. Sipas pamjeve filmike të bëra publike, më 9 tetor, Milan Radoiçiq – i cili ndodhet nën pesë fletarrestime ndërkombëtare të lëshuara nga Prishtina dhe është subjekt i sanksioneve amerikane e britanike për shkak të lidhjeve me krimin e organizuar transnacional – u shfaq pranë Danillo Vuçiqit, djalit të presidentit serb, jashtë sallës ku po mbahej tubimi i Partisë Përparimtare Serbe (SNS) në Kragujevc. Për ekzekutivin kosovar, këto skena duhet të shërbejnë si një kambanë alarmi për Bashkimin Evropian dhe shtetet e tjera perëndimore. Në reagimin zyrtar të Qeverisë sukej se Beogradi jo vetëm që refuzon ta dorëzojë Radoiçiqin për të përballur drejtësinë kosovare dhe nuk e ndjek penalisht në vendin e tij, por përkundrazi, ai shfaqet nën mbrojtjen dhe shoqërinë e drejtpërdrejtë të familjes së kreut të shtetit serb. Nga ana e saj, Partia Përparimtare Serbe nuk ka kthyer ndonjë përgjigje zyrtare lidhur me praninë e diskutueshme të Radoiçiqit në këtë tubim politik. Duke analizuar këtë zhvillim, ekspertja e pavarur për çështjet e sigurisë, Maja Bjellosh, ka vlerësuar se prania e Radoiçiqit krah Danillo Vuçiqit kishte për qëllim primar frikësimin e oponentëve politikë, veçanërisht mbështetësve të Listës Studentore. Sipas saj, kjo dëshmon hapur mbrojtjen dhe lidhjet politike që zyrtarët më të lartë të shtetit serb dhe familja Vuçiq i sigurojnë një personi që dyshohet për organizimin e grupit përgjegjës si për vrasjen e politikanit serb Oliver Ivanoviq, ashtu edhe për sulmin ndaj Policisë së Kosovës. Lista Studentore “Studentët fitojnë”, e cila ka dalë nga lëvizja protestuese kundër qeverisë që ka vepruar për afro dy vjet në qytete të ndryshme të Serbisë duke denoncuar korrupsionin dhe degradimin institucional, paraqitet si sfiduesja kryesore e partisë në pushtet në zgjedhjet e ardhshme. Kjo nuk është hera e parë që individë të lakuar në aktakuzat e drejtësisë kosovare shihen në afërsi të strukturave pushtetore serbe. Më parë, një hulumtim kishte konfirmuar praninë e Vladimir Vuçetiqit – një prej 45 personave të akuzuar nga Prokuroria e Kosovës për ngjarjet në Banjskë – në mesin e truprojave pranë ndërtesës së Presidencës në Serbi. Kujtojmë se Milan Radoiçiq ka pranuar publikisht se ka udhëhequr grupin e armatosur që ndërmori sulmin e 24 shtatorit 2023 në Banjskë të Zveçanit. Gjatë këtij sulmi terrorist humbi jetën rreshteri policor Afrim Bunjaku, kurse në shkëmbimin e mëvonshëm të zjarrit mbetën të vrarë edhe tre anëtarë të grupit paramilitar.