Kërcënimet e Daçiqit për Prizrenin, ambasadori Zemaj i kërkon NATO-s veprim të prerë kundër retorikës nacionaliste

Ambasadori i Kosovës për marrëdhënie me NATO-n, Astrit Zemaj, ka ngritur alarmin dhe ka dënuar ashpër deklaratat luftënxitëse të zyrtarit të lartë serb, Ivica Daçiq, duke kërkuar nga Aleanca Veriatlantike dhe instancat ndërkombëtare një përgjigje të fortë dhe institucionale ndaj kësaj gjuhe që rrezikon paqen në rajon. Reagimi i diplomatit kosovar vjen pas fjalimit të Daçiqit, i cili në cilësinë e kryetarit të Partisë Socialiste të Serbisë (SPS) dhe ministrit në qeverinë serbe, më 7 tetor në Rashkë, deklaroi hapur se “herët a vonë flamuri serb do të valojë mbi Prizren”, duke mohuar sërish ekzistencën dhe pavarësinë e shtetit të Kosovës. Zemaj ka theksuar se këto deklarata nuk mund të kalojnë si thjesht diskurs elektoral, por përbëjnë një platformë të rrezikshme nacionaliste që synon destabilizim dhe cënim direkt të realitetit shtetëror të Kosovës. Sipas tij, kjo qasje sjell në vëmendje periudhën e errët të regjimit të Sllobodan Millosheviqit dhe luftërat e përgjakshme që shkaktoi ai në Ballkan. Ai ka kujtuar se partia e Daçiqit ka qenë pjesë përbërëse e atij pushteti që la pas pasoja tragjike, vrasje masive, dëbime dhe mbi 13.500 shqiptarë të vrarë gjatë luftës së viteve 1998–1999, krime këto që sollën edhe ndërhyrjen e domosdoshme të NATO-s për t'i dhënë fund katastrofës humanitare. Sipas ambasadorit, pretendimet territoriale të lidershipit serb nuk mund të fshihen pas albisë gjoja të mbrojtjes së serbëve lokalë, pasi Kushtetuta e Republikës së Kosovës u garanton atyre 20 vende në Kuvend, duke përfshirë 10 ulëse të rezervuara, si dhe mekanizma të avancuar mbrojtës që përfaqësojnë garanci të forta të rendit demokratik. Duke adresuar shqetësimin e tij, Zemaj i ka bërë thirrje zyrtarisht strukturave më të larta ushtarake dhe politike të NATO-s, duke përfshirë kryetarin e Komitetit Ushtarak të NATO-s, Admiral Giuseppe Cavo Dragone; Komandantin Suprem të Forcave Aleate në Evropë (SACEUR), Gjeneral Alexus G. Grynkewich; komandantin e Komandës së Forcave të Përbashkëta Aleate në Napoli, Admiral George M. Wikoff; komandantin e KFOR-it, Gjeneralmajor Özkan Ulutaş; si dhe drejtorin e Ekipit Këshillues dhe Ndërlidhës të NATO-s (NALT), Thomas Schulte-Borghoff. Në këtë drejtim, ai ka kërkuar që këto mesazhe të mos nënvlerësohen, por të trajtohen me seriozitetin maksimal përmes kanaleve zyrtare në selinë qendrore në Bruksel, SHAPE, Napoli, KFOR dhe NALT, duke paralajmëruar se çdo heshtje apo tolerim ndaj kërcënimeve të tilla territoriale mund të inkurajojë përsëritjen e skenarëve të rrezikshëm për sigurinë.