Incident i rëndë hekurudhor në Kroaci: 11 vagonë përfundojnë në humnerë pas dështimit të frenave

Një tren mallrash është përfshirë në një aksident të rëndë gjatë ditës së shtunë, pasi ka dalë nga shinat në afërsi të stacionit hekurudhor Meja në Kroaci, duke lënë pas dëme të konsiderueshme materiale. Fatmirësisht, nga ky incident nuk raportohet për ndonjë person të lënduar, ndërkohë që autoritetet kompetente vijojnë hetimet për të zbardhur shkaqet e sakta që sollën këtë ngjarje. Bëhet fjalë për një garniturë të kompanisë private Transagent, e cila po transportonte ngarkesë me drithëra drejt Rekës kur, rreth orës 09:25, situata dolio nga kontrolli. Sipas të dhënave paraprake, makinisti kishte sinjalizuar dispeçerin se sistemi i frenimit kishte pësuar defekt total dhe se nuk po arrinte ta ndalte mjetin. Për pasojë, 11 vagonë u shkëputën dhe ranë në një humnerë, ndërsa lokomotiva bashkë me dy vagonë të tjerë mbetën të bllokuar në zonën e stacionit hekurudhor. Si rrjedhojë e këtij aksidenti, qarkullimi i trenave në këtë segment është ndërprerë plotësisht. Për të lehtësuar lëvizjen e pasagjerëve, operatorët kanë vënë në dispozicion autobusë zëvendësues, ndërsa në pjesët e tjera të rrjetit qarkullimi po vijon sipas orarit normal. Damir Lonçariq, kryetar i bordit drejtues të "HŽ Infrastruktura", ka deklaruar se ende nuk ka një afat se kur mund të rikthehet normaliteti në linjë. Ai u ka bërë thirrje të gjithë operatorëve hekurudhorë, veçanërisht atyre privatë, që të shtojnë kontrollet mbi gjendjen teknike të lokomotivave dhe vagonëve të tyre. Lonçariq shtoi se nëse verifikohet versioni i defektit në frenim, atëherë përgjegjësia nuk do të ketë lidhje me mangësitë në infrastrukturën hekurudhore. Nga ana tjetër, kryetari i Sindikatës së Drejtuesve të Trenave të Kroacisë, Nenad Mrgan, ka lëshuar akuza të ashpra në drejtim të kompanisë Transagent, duke ngritur alarmin për nivelin e ulët të sigurisë teknike të mjeteve të saj. “Drejtues i papërgjegjshëm, kompani e papërgjegjshme Transagent. Kjo u ndodh për të dytin vit radhazi. Fakt është se problemi qëndron te vagonët”, u shpreh Mrgan. Kreu i sindikatës theksoi se institucionet përkatëse ishin vënë në dijeni më herët për rreziqet e mundshme dhe se ishte kërkuar ndalimi i qarkullimit të mjeteve që nuk plotësojnë kushtet. Kujtojmë se ngjarje të ngjashme janë regjistruar edhe më parë në këtë zonë. Lonçariq përmendi se rreth tre vite më parë ka ndodhur një aksident tjetër pothuajse në të njëjtin vend, ku gjithashtu ishin të përfshirë operatorë privatë. Autoritetet mbeten në pritje të përfundimit të hetimeve zyrtare për të përcaktuar përgjegjësitë e mundshme të stafit apo kompanisë.