Kombëtarja e Kosovës U19 barazon në miqësoren e parë ndaj Maqedonisë së Veriut

Përfaqësuesja e Kosovës U19 në grupin e vajzave ka regjistruar një barazim 1-1 kundër Maqedonisë së Veriut, në takimin e parë kontrollues të zhvilluar në ambientet e Kampit Nacional në Hajvali. Kjo përballje miqësore ka ardhur në kuadër të ciklit përgatitor për vajzat e drejtuara nga shtabi teknik, para sfidave zyrtare kualifikuese që do të zhvillohen gjatë muajit të ardhshëm. Pjesa e parë solli epërsi për skuadrën mysafire, e cila arriti të zhbllokojë shifrat përmes futbollistes Jovana Karolioska, duke e mbyllur fraksionin e parë me avantazhin minimal. Megjithatë, reagimi i Përfaqësueses së Kosovës nuk vonoi dhe erdhi menjëherë në hapje të pjesës së dytë, kur Anisa Meha tundi rrjetën, duke vendosur baraspeshën dhe vulosur rezultatin përfundimtar të këtij takimi në 1-1. Programi parashikon që të dyja kombëtaret të matin sërish forcat të hënën në ndeshjen e dytë miqësore, e cila do të nisë nga ora 12:00, sërish në fushën e Kampit Nacional në Hajvali.