Prapa skenave të Shtëpisë së Bardhë: Kush është bashkëshorti producent i zëdhënëses së re të Donald Trump?

Emërimi i Katie Zacharia në postin e zëdhënëses së re të Shtëpisë së Bardhë ka sjellë në qendër të vëmendjes publike edhe bashkëshortin e saj, Tyler Zacharia, një producent filmash me një karrierë të suksesshme në Hollivud, i cili ka marrë pjesë në realizimin e projekteve të njohura si Silence, The Starling dhe The Irishman i Martin Scorsese. Tyler Zacharia është një njohës i mirë i industrisë së argëtimit dhe investimeve, i cili katër vitet e fundit ka mbajtur pozicionin e Drejtorit Operativ (COO) në kompaninë "2521 Entertainment". Të dhënat e specializuara të filmit dëshmojnë se Tyler Zacharia ka kontribuar si producent në më shumë se 15 filma, ndërsa projekti i tij më i ri kinematografik është filmi Roofman. Veprimtaria e tij në këtë sektor përfshin gjithashtu drejtimin e operacioneve të biznesit pranë kompanive "Boies Schiller Entertainment" dhe "CenterStage Technologies". Sipas të dhënat profesionale në rrjetin LinkedIn, ai ka shërbyer si Drejtor Operativ (COO) në shtëpitë e prodhimit "Limelight Productions" dhe "Fabrica de Cine", si dhe ka qenë Drejtor Ekzekutiv (CEO) dhe bashkëthemelues i "Moriah Media" dhe "SharpSword Films". Sa i takon formimit akademik, Zacharia është diplomuar në Universitetin Georgetown dhe mban një diplomë Master në Administrim Biznesi (MBA) nga Universiteti Pepperdine. Në nisje të rrugëtimit të tyre jetësor, çifti ka kaluar një periudhë duke jetuar dhe punuar në Pekin. Gjatë viteve 2011–2013, Katie ka ushtruar profesionin si bashkëpunëtore në firmën ligjore "Zhong Lun", ndërkohë që drejtonte fushatat e komunikimit dhe sigurimit të fondeve për organizatën jofitimprurëse "Compassion for Migrant Children". Në të njëjtën hark kohor, Tyler ka mbajtur detyrën e zëvendëspresidentit me seli në Pekin për "SGI Frontier Capital", një fond i kapitalit të sipërmarrjes të orientuar drejt tregjeve në zhvillim. Sipas biografisë së tij zyrtare, ai ka mbikëqyrur operacionet e investimeve në Kinë, Mongoli dhe Brazil në periudhën midis viteve 2007 dhe 2013. "Kam studiuar në Georgetown dhe kam kaluar njëfarë kohe në Pekin gjatë studimeve të mia. Pas diplomimit, u ktheva në Kinë dhe takova një person që po niste një fond të kapitalit sipërmarrës. Atij i duhej dikush që fliste kinezisht. Nuk dija asgjë për financat, por ai më punësoi dhe unë mësova gjatë punës," është shprehur Tyler Zacharia në faqen e internetit të Universitetit Pepperdine. "Kompania nisi me katër persona dhe shpejt u rrit në dyzet punonjës në gjashtë vende të ndryshme. Mësova se, kur mbyll marrëveshje në Kinë – apo kudo tjetër, në fakt – shifrat dhe të dhënat nuk janë aq të rëndësishme sa aftësitë në marrëdhëniet me njerëzit. Kjo është ajo që më pëlqen shumë më tepër sesa të qëndroj ulur para tabelave të llogaritjeve", ka shtuar më tej ai. Katie dhe Tyler Zacharia janë të martuar prej vitit 2011, janë prindër të katër fëmijëve dhe jetojnë në Kaliforninë Jugore. Lidhja e tyre ka filluar shumë kohë përpara se Katie të kthehej në një figurë të spikatur të medias dhe politikës konservatore, fushë ku ajo ka shërbyer pranë Departamentit të Sigurisë Kombëtare dhe "Trump Media & Technology Group", ndër të tjera. Baza e interesit të shtuar mediatik vjen pas njoftimit të bërë të premten nga presidenti Donald Trump, i cili konfirmoi zyrtarisht se Katie Zacharia do të marrë drejtimin si sekretare e shtypit e Shtëpisë së Bardhë, duke pasuar në këtë detyrë Carolina Leavitt.