Tragjedia në Athinë: Tre shqiptarë të humbur nën rrënoja pas shpërthimit shkatërrues

Tre shtetas shqiptarë janë shpallur të zhdukur si pasojë e një shpërthimi të fuqishëm që ka shkaktuar shembjen e një ndërtese në rrugën “Lysikratous”, në lagjen historike të Plakës në kryeqytetin grek, Athinë. Ngjarja e rëndë ka ndodhur gjatë orëve të mëngjesit të së premtes, duke shembur një pjesë të konsiderueshme të objektit. Deri në këto momente, ekipet e emergjencës dhe të kërkim-shpëtimit kanë arritur të nxjerrin dy trupa të pajetë nga gërmadhat. Sipas autoriteteve vendase, njëra nga viktimat është një grua, ndërsa trupi i dytë i përket një 77-vjeçari me shtetësi britanike. Ndërkohë, operacionet intensive në terren për gjetjen e personave të tjerë vijojnë pa ndërprerje. Në vendngjarje janë angazhuar rreth 30 zjarrfikës, gjashtë automjete operacionale, si dhe njësitë e specializuara të EMAK-ut të mbështetura nga qen gjurmues për kërkim-shpëtim.