Austria në ankth para duelit me Kosovën: Sulmuesi kryesor në dyshim për shkak dëmtimi

Kombëtarja e Austrisë mund të mbetet pa shërbimet e sulmuesit të saj kryesor, Michael Gregoritsch, në sfidën e rëndësishme kundër Kosovës në Ligën e Kombeve. 32-vjeçari nuk ka puthur fushën e blertë në seancën e fundit stërvitore të mbajtur të shtunën, për shkak të një dëmtimi të pësuar në kyçin e këmbës. Sipas njoftimeve zyrtare, lojtari është kufizuar vetëm në një program të posaçëm individual në qendrën stërvitore të Federatës Austriake të Futbollit, e cila ndodhet në Vjenë-Aspern. Për këtë arsye, paraqitja e tij në ndeshjen e së dielës, e cila do të nisë në orën 18:00 në stadiumin legjendar “Ernst-Happel”, mbetet ende e paqartë dhe do të vlerësohet në momentet e fundit. Gregoritsch e ka pësuar këtë lëmtim gjatë ditës së enjten, ndërkohë që mbante shiritin e kapitenit në fitoren 3:1 që Austria regjistroi kundër Izraelit në qytetin e Linz-it. Nëse shtatlarti austriak nuk ia del të rikuperohet në kohë, vendin e tij në formacionin bazë pritet ta marrë sulmuesi Sasha Kalajxhiq. Ndryshe nga Gregoritsch, Kalajxhiq ka marrë pjesë rregullisht në stërvitjen e së shtunës, duke u bashkuar me grupin tjetër të lojtarëve të gatshëm për këtë përballje. Pasi të mbyllë takimin në shtëpi ndaj Kosovës, përfaqësuesja austriake do të udhëtojë për dy ndeshje radhazi në transfertë gjatë këtij cikli grumbullimi. Fillimisht do të përballet me Irlandën të enjten në orën 20:45 në Dublin, ndërsa më pas do të ketë sërish ndeshjen kundër Kosovës, e cila do të zhvillohet të dielën e ardhshme në orën 18:00.