Tragjedia në Gjilan, shefi i UNMIK-ut dënon ashpër aktin e dhunës: E papranueshme

Përfaqësuesi Special i Sekretarit të Përgjithshëm dhe udhëheqësi i misionit të UNMIK-ut, Peter Due, ka reaguar me ashpërsi ndaj vrasjes së dyfishtë që ndodhi një ditë më parë në fshatin Livoç të Ulët të Gjilanit, ku humbën jetën një grua dhe vëllai i saj, ndërsa një familjar tjetër mbeti i plagosur. Duke u shprehur ngushëllimet më të sinqerta familjarëve dhe të afërmve të viktimave, Due ka përcjellë gjithashtu urimet për shërim të plotë e sa më të shpejtë për personin që ka pësuar lëndime. "Kjo humbje tragjike e jetëve nxjerr në pah koston shkatërruese njerëzore të dhunës me bazë gjinore. Një dhunë e tillë është e papranueshme dhe nuk duhet të tolerohet kurrë apo të trajtohet si çështje private," ka theksuar ai në deklaratën e tij. Në vijim, numri një i UNMIK-ut u ka bërë thirrje institucioneve kompetente që të intensifikojnë përpjekjet e tyre të përbashkëta dhe të bashkërenduara me qëllim parandalimin e dukurisë së dhunës me bazë gjinore. Kujtojmë se ngjarja e rëndë ndodhi të premten në Livoç të Ulët të Gjilanit, ku dyshohet se një person qëlloi me armë zjarri, duke lënë të vdekur bashkëshorten e tij dhe vëllain e saj, si dhe duke plagosur djalin e axhës së bashkëshortes. Sipas njoftimit të Policisë së Kosovës, i dyshuari është prangosur menjëherë pas krimit. Gjatë heqjes në dy lokacione të ndryshme të ngjarjes, autoritetet policore kanë konfiskuar katër fishekë, 21 gëzhoja dhe pesë predha. Ndërkohë, me urdhër të prokurorit kompetent janë ndërmarrë bastisje në objektet banuese dhe pronat e të dyshuarit. Gjatë kontrollit, policia ka gjetur dhe sekuestruar dy armë të gjata me leje të skaduar, një pistoletë pa leje, një armë pneumatike, 520 fishekë të kalibrave të ndryshëm, si dhe 1600 diabolla të destinuara për pushkë pneumatike.