Analiza çeke paralajmëron Kroacinë para supersfidës në Pragë në Ligën e Kombeve

Kombëtarja e Kroacisë nis sonte rrugëtimin e saj në edicionin e ri të Ligës së Kombeve, ku do të përballet me Çekinë në “Fortuna Arena” të Pragës, me fillim nga ora 20:45. Kjo sfidë shënon paraqitjen e parë zyrtare për Slaven Biliç në krye të stolin kroat gjatë mandatit të jo të dytë. Kroacia bën pjesë në Grupin A3, ku konkurojnë gjithashtu Spanja dhe Anglia. Pas transfertës në kryeqytetin çek, kalendari rezervon përfaqësimin e radhës më 29 shtator ndaj Spanjës në Sevilla, më 3 tetor përballë Anglisë në Rijeka, ndërsa tri ditë më vonë do të ketë sërish duel me spanjollët, kësaj radhe në Split. Ndeshja e sotme mbart një rëndësi të veçantë për të dyja bankinat drejtuese. Tekniku spanjoll Santi Denia do të bëjë debutimin e tij zyrtar si trajner i Çekisë, ndërkohë që Biliç rikthehet në drejtimin e kroatëve pas një periudhe prej 14 vitesh. Gjatë ciklit të tij të parë, nga viti 2006 deri në 2012, Biliç e udhëhoqi Kroacinë në 65 ndeshje zyrtare, duke regjistruar vetëm tetë humbje. Nga ana tjetër, Denia mori drejtimin e përfaqësueses çeke menjëherë pas përfundimit të Kupës së Botës, duke zëvendësuar në këtë detyrë Miroslav Koubek. Për sa i përket vlerësimeve paraprake, shtypi vendas në Çeki ka hedhur dritë mbi formën aktuale të përfaqësueses ballkanike, duke ngritur disa pikëpyetje. Sipas analizave të publikuara në Pragë, ndonëse tifozët e lidhin ende Kroacinë me sukseset e mëdha si finalja e Botërorit 2018 apo vendi i tretë në atë të vitit 2022, gjendja e tanishme e skuadrës nuk paraqitet në të njëjtat nivele kulmore. Treguesit e bazuar te statistika e golave të pritur (xG) tregojnë se Kroacia renditet aktualisht vetëm në gjysmën e poshtme të elitës së Ligës së Kombeve. Statistika xG shërben për të matur nivelin e rasteve për shënim dhe përllogarit shanset reale që një goditje të përfundojë në rrjetë. Sipas të dhënave, kulmi i këtij treguesi për Kroacinë u regjistrua gjatë pranverës së vitit 2024, ndërsa që prej atëherë trajektorja ka shënuar rënie të vazhdueshme. Edhe pse Çekia pozicionohet në shkallë më të ulëta të kësaj renditjeje, diferenca mes dy kundërshtarëve vlerësohet e vogël, ndërkohë që Spanja dhe Anglia qëndrojnë dukshëm më lart. Komentet e mediave çeke nënvizojnë se më domethënëse se vetë pozicioni është tendenca e formës, duke e cilësuar Kroacinë si një skuadër që mbërrin në Pragë në periudhën e saj më të zbehtë të dy viteve të fundit dhe me një staf teknik të ri. Sa i përket formatit të garës, dy kombëtaret e para të grupit sigurojnë kualifikimin për në çerekfinalet e Ligës së Kombeve. Skuadra e renditur e treta do të luajë në fazën “play-off” për të siguruar mbijetesën në Ligën A. Këto dy Përfaqësuese janë ndeshur së fundmi edhe në kuadër të eliminatoreve për Kupën e Botës 2026, ku Kroacia triumfoi 5:1 në Osijek, kurse sfida e zhvilluar në tokën çeke u mbyll pa gola, me rezultatin 0:0.