Operacioni 'Transit 4' në Shkodër: Kapet 23-vjeçari që po trafikonte shtatë emigrantë drejt Malit të Zi

Uniformat blu në Shkodër kanë prangosur një 23-vjeçar, pasi është kapur në flagrancë duke transportuar me automjetin e tij shtatë emigrantë të huaj, të cilët kishin për qëllim kalimin ilegal të kufirit drejt Malit të Zi. Ky aksion është finalizuar me sukses në kuadër të operacionit policor të koduar “Transit 4”, ndërmarrë nga Drejtoria Vendore për Kufirin dhe Migracionin në Shkodër, si pjesë e masave të vazhdueshme për të luftuar fenomenin e dhënies së ndihmës ndaj shtetasve të huaj për kalimin e paligjshëm të kufijve. Gjatë zhvillimit të këtij operacioni, në aksin rrugor Vukpalaj–Aliaj, efektivët e Policisë Kufitare kanë bërë të mundur bllokimin e mjetit që drejtohej nga i riu Luis Muço, 23 vjeç, me banim në Urën Vajgurore. Brenda automjetit u konstatuan dhe u ndaluan shtatë emigrantë të huaj, konkretisht pesë prej tyre nga Filipinet dhe dy nga Afganistani, të cilët sipas hetimeve paraprake po transportoheshin kundrejt shpërblimit financiar. Në cilësinë e provës materiale, policia ka sekuestruar automjetin e përdorur për transportin e tyre. Ndërkohë, dokumentacioni procedurial i është përcjellë Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme ligjore.