Ironizon Rrahmani: Kodi Civil dhe projektligjet për martesat e njëjta dhe ndryshimin e gjinisë vijnë në Qeveri deri në fund të vitit

Deputeti i Partisë Demokratike të Kosovës (PDK), Eman Rrahmani, ka përdorur një ton ironik ndaj kryeministrit Albin Kurti, lidhur me hapat e ekzekutivit për miratimin e Kodit Civil dhe nismave ligjore që rregullojnë çështjet e martesës, lindjeve dhe ndryshimit të gjinisë. Nëpërmjet një shkrimi të publikuar në rrjetet sociale, Rrahmani ka vënë në shënjestër kreun e Qeverisë, duke paralajmëruar me sarkazëm se këto projektligje do të dërgohen së shpejti për miratim në kabinetin qeveritar. “Mirëmëngjesi, ju habibat e Albinit! E paska vendosë me ju nderu shpejt me ligje, veç bëhuni gati!”, ka shkruar ligjvënësi i PDK-së në hyrje të reagimit të tij. Më tej, ai ka specifikuar data konkrete se kur pret që këto akte ligjore të kalojnë në Qeveri, duke u ndalur te Kodi Civil që, sipas pretendimeve të tij, do të procedohet më 15 nëntor. “Ju që doni me u martu burra me burra e gra me gra, Kodin Civil po jua sjell në Qeveri më 15 nëntor”, ka theksuar Rrahmani. Deputeti ka vazhduar me të njëjtin ritëm ironik edhe për çështje të tjera, duke paralajmëruar datën 30 dhjetor për një projektligj që sipas tij lidhet me lindjen e fëmijëve, si dhe natën e Vitit të Ri, më 31 dhjetor, për projektligjin që rregullon ndryshimin e gjinisë. “Ju që po prisni me lindë gratë pa burra, ligjin po ju asjell në Qeveri më 30 dhjetor”, është shprehur ai, duke shtuar: “E për ju që jeni tu pritë me ndërru gjininë, paska me ju nderu për natën e Vitit të Ri! Ligjin po jua sjell në Qeveri më 31 dhjetor”. Në mbyllje të reagimit të tij, deputeti Eman Rrahmani i ka vënë kapak shkrimit me një tjetër kunj satirike drejtuar kryeministrit Albin Kurti, duke shkruar: “Qysh thojke edhe njani: ‘Shyqyr që të kemi, Albin!’”.