OKB: Izraeli mban dhjetëra sirianë në paraburgim dhe intensifikon sulmet ushtarake

Zyra e Komisionerit të Lartë të OKB-së për të Drejtat e Njeriut, e drejtuar nga Volker Türk, ka njoftuar se autoritetet izraelite po mbajnë aktualisht të ndaluar 49 shtetas sirianë, ndërkohë që vetëm gjatë muajit shtator janë regjistruar 280 ndërhyrje të armatosura brenda territorit të Sirisë. Në një komunikatë të lëshuar të premten, institucioni i drejtuar nga Türk bëri të ditur se personat e liriçuar nga paraburgimi kanë dëshmuar për “akuza të rënda rreth torturës dhe keqtrajtimit”, si dhe për shkelje të tjera flagrante të të drejtave elementare të njeriut. Sipas të dhënave zyrtare të kësaj zyre, muaji shtator ka shënuar shifrën më të lartë mujore të inkursioneve ushtarake izraelite në Siri përgjatë këtij viti. Këto operacione, siç theksohet në njoftim, përfshijnë “sulme të konfirmuara ndaj banesave private, kufizime të ashpra të lëvizjes, akte frikësimi ndaj popullsisë civile, ndalime arbitrare, si dhe dëmtim të burimeve të jetesës”. Përballë kësaj situate, zyra e OKB-së u ka bërë thirrje urgjente autoriteteve të Izraelit “të ndalin menjëherë çdo veprim që synon ngacmimin ose frikësimin e banorëve civilë në zonat rurale siriane, duke përfshirë sulmet, pengimin e lirisë së lëvizjes, burgosjet dhe shkatërrimin e prodhimeve bujqësore”.