Nderim për dëshmorët: Promovohet sonte kënga prekëse “Ne nuk harrojmë” në prani të personaliteteve ndërkombëtare

Në kuadër të ditës kushtuar përkujtimit të krimeve dhe gjenocidit të shkaktuar në Abri të Epërme, Qendra “Gjenocidit në Kosovë-Plagë e Hapur” do të organizojë mbrëmjen e sotme ceremoninë e përurimit të këngës “Ne nuk harrojmë”, një dedikim i veçantë për të gjithë dëshmorët dhe martirët e rënë gjatë luftës çlirimtare. Kjo ngjarje solemne do të zhvillohet në ambientet e “AMC Hall”, përgjatë rrugës Cërriku në Obiliq, duke filluar nga ora 18:00. Për ta ngritur peshë këtë mbrëmje, në skenë do të ngjiten emra të shquar të muzikës sonë kombëtare, si Enkelejda Arifi, Ilir Shaqiri, Kastriot Tusha, Nikollë NikPrelaj dhe Selami Kolonja. Sipas komunikatës zyrtare, ky manifestim do të ketë pjesëmarrje të rëndësishme ndërkombëtare. Nga Danimarka ka udhëtuar posaçërisht për këtë rast intelektuali danez Niels Henrik Hooge, ish-luftëtar vullnetar i Ushtrisë Çlirimtare të Kosovës dhe i dekoruar nga Presidenca për kontributin e dhënë në lirinë e vendit, i shoqëruar nga historiani dhe eksperti i çështjeve ballkanike, Tue Magnussen, si dhe shkrimtarja nga Galicia e Spanjës, e cila është autorja e librit “Mirupafshim në Kosovë”. Gjithashtu, në njoftim bëhet e ditur se ngjarja do të nderohet edhe nga prania e gazetarit të mirënjohur britanez, Vaughan Smith, i cili është i njohur për filmimet e tij autentike gjatë akteve të gjenocidit në Prekaz, në lagjen e familjes Jashari. Përtej dimensionit përkujtues dhe homazhit për të rënët, ky organizim shërben si një thirrje e fuqishme për triumfin e drejtësisë, duke kërkuar ndëshkimin e merituar për autorët e krimeve dhe gjenocidit në Kosovë, si dhe lirimin e menjëhershëm të luftëtarëve të lirisë.