Tragjedia me dy të vrarë në Gjilan: Operohet i plagosuri, mjekët japin detajet mbi gjendjen e tij

I plagosuri nga tështënat me armë zjarri në fshatin Livoç të Gjilanit, ku mbetën të vrarë dy persona, i është nënshtruar një ndërhyrjeje të menjëhershme kirurgjike. Bëhet fjalë për një burrë të lindur në vitin 1978, i cili pësoi lëndime të rënda gjatë incidentit tragjik të ditës së sotme. Detajet mbi gjendjen e tij shëndetësore i ka bërë të ditura drejtori i Emergjencës, Naser Syla. Ai konfirmoi se menjëherë pas realizimit të kontrollit dhe ekzaminimeve paraprake mjekësore, pacienti është futur me urgjencë në sallën e operacionit. Për sanimin e plagëve të marra, ndërhyrja komplekse është kryer nga një ekip i specializuar mjekësor, ku përfshiheshin mjekët kujdestarë të kirurgjisë abdominale, urologjisë si dhe specialistët e anestezionit. Edhe pse operacioni ka përfunduar, gjendja shëndetësore e të plagosurit mbetet serioze, por nën kontrollin e mjekëve. “Është përfunduar ndërhyrja kirurgjike, gjendja e pacientit e rëndë, por stabile. Vazhdon trajtimin”, ka deklaruar Syla, duke bërë me dije se pacienti po vijon marrjen e kujdesit të nevojshëm intensiv.