Skenderaj në zi, sot përcillet për në banesën e fundit veterani dhe invalidi i UÇK-së, Ali Ngucati

Komuna e Skenderajt i ka dërguar një telegram ngushëllimi familjes, miqve dhe bashkëluftëtarëve për humbjen e jetës së veteranit dhe invalidit të Ushtrisë Çlirimtare të Kosovës, Ali Ngucati, i cili ishte me banim në fshatin Polac. Përmes këtij mesazhi zyrtar, institucioni komunal ka evokuar me respekt rrugëtimin dhe kontributin e çmuar të të ndjerit, duke kujtuar angazhimin e tij ndër vite në radhët e UÇK-së, Trupat Mbrojtëse të Kosovës (TMK), si dhe në Forcën e Sigurisë së Kosovës (FSK). Në shenjë solidarizimi me dhimbjen e familjarëve, kryetari i Komunës së Skenderajt, Sami Lushtaku, ka përcjellë ngushëllimet e tij më të thella për të gjithë të afërmit, shokët e armëve dhe gjithë ata që patën fatin ta njihnin nga afër Ali Ngucatin. “Jeta dhe kontributi i Ali Ngucatit mbeten pjesë e kujtesës sonë të përbashkët. Ndarja e tij nga jeta përbën një humbje të ndjeshme për familjen, bashkëluftëtarët dhe të gjithë ata që patën rastin ta njohin e të bashkëpunojnë me të”, theksohet në telegramin e lëshuar nga Komuna.