Mesazh i qartë nga Mynihu: Rummenigge tregon planin e Bayernit për Olisen dhe Kanen, shanset e Realit zvogëlohen

Real Madridi ka kohë që mban në shënjestër Michael Olisen, me talentin francez që ishte lidhur me një kalim të mundshëm në kryeqytetin spanjoll që prej merkatos së verës së kaluar. Megjithatë, "Los Blancos" përfundimisht ndryshuan drejtim për të transferuar anësorin e RB Leipzigut, Yan Diomande, pasi u bë e qartë se drejtuesit e Bayern Munichut nuk kishin ndërmend ta linin të lirë yllin e tyre. Brenda strukturave të gjigantit bavarez ekziston një bindje e plotë se anësori francez do t'i vërë fre çdo spekulimi, duke e lidhur të ardhmen e tij afatgjatë me fanellën e klubit gjerman. Karl-Heinz Rummenigge, anëtar i bordit mbikëqyrës të Bayernit, ka shfaqur hapur optimizmin e tij se si Olise ashtu edhe Harry Kane do të vazhdojnë aventurën e tyre në Mynihu. Në një deklaratë të dhënë për mediat gjermane, Rummenigge i ka dërguar një sinjal të prerë drejtuesve të Real Madridit. "Të dy synojnë të qëndrojnë te Bayerni për një kohë të gjatë", ka u shpreh ai, duke shtuar se ka shpresa dhe është jashtëzakonisht i bindur se Harry do ta zgjasë bashkëpunimin së shpejti, ndërsa menjëherë pas tij do të vijë radha e Michaelit. Edhe pse Olise ende nuk ka vënë firmën mbi një marrëveshje të re, komentet e zyrtarit të lartë reflektojnë qartësisht strategjinë e klubit. 24-vjeçari luan një rol kyç në skemat e skuadrës, dhe drejtuesit janë të vendosur ta mbrojnë një prej aseteve të tyre më të çmuara në repartin ofensiv nga joshja e klubeve të tjera evropiane. Ndonëse lojtari duket i lumtur në Mynihu, madrilenët mbeten i vetmi opsion real që mund t'ia trondiste bindjet. Raportimet e mëparshme sugjeronin se francezi do të shqyrtonte rinovimin me klubin e Bundesligës, përveç rasteve kur Reali do të ndërmerrte hapa konkretë për ta sjellë në Spanjë. Kjo situatë e vendos gjigantin spanjoll përballë një dileme strategjike: të veprojë me agresivitet për të dëshmuar ambiciet e tij, ose të rrezikojë që ky objektiv të bëhet i pamundur për t'u arritur në të ardhmen. Vullneti i hekurt i Bayernit për t'i siguruar shërbimet e Olises në afatgjatë nënkupton se Reali nuk ka luksin të presë gjatë para se të marrë një vendim final. Pytja kyçe mbetet nëse kampionët spanjollë e shohin vërtet francezin si një prioritet absolut për merkaton. Me alternativa si Vinicius Junior, Arda Guler dhe afrimin e verës, Diomande, trajneri ka tashmë opsione në dispozicion në fazën sulmuese. Afrimi i një tjetër anësori me kosto të lartë do të kërkonte një analizë të imtësishme të minutave në fushë dhe të ekuilibrit taktik. Megjithatë, vizioni, kontrolli i shkëlqyer i topit dhe aftësia e Olises për të prodhuar raste nga krahu i djathtë do t'i jepnin skuadrës një dimension krejtësisht ndryshe. Ai do t'i dhuronte Real Madridit një armë shtesë për të çeduar blloqet e ulëta mbrojtëse, pa u varur vetëm te depërtimet personale. Pavarësisht kësaj, bëhet fjalë për një operacion jashtëzakonisht të ndërlikuar për klubin mbretëror, nëse vendoset që kjo pistë të ndiqet deri në fund. Nëse drejtuesit dhe stafi teknik besojnë se Olise është pjesa e munguar e mozaikut sulmues, atëherë duhet bërë çdo sakrificë financiare për ta transferuar, ndërkohë që mbetet për t'u parë se çfarë do të rezervojë e ardhmja për yllin francez.