Goditje e rëndë në horizont: Manchester United rrezikon humbje financiare dhe largimin e supertalentit

Gjiganti anglez Manchester United mund të përballet me një dëm të ndjeshëm financiar dhe sportiv, pasi 16-vjeçari JJ Gabriel, një nga premtimet më të mëdha të akademisë, nuk ka firmosur ende një marrëveshje profesionale dhe po shqyrton mundësinë e largimit. Sipas burimeve nga ishulli, futbollisti i ri, i cili festoi ditëlindjen e 16-të më 6 tetor, kishte kërkuar që në shtator zhvlerësimin e regjistrimit të tij pranë strukturave të klubit. Kjo krizë e papritur ka vënë në alarm drejtuesit e “Djajve të Kuq”, të cilët e shohin adoleshentin si një element kyç për të ardhmen e skuadrës. Alarmi rreth largimit të tij është bërë edhe më i madh për shkak të planeve të trajnerit Michael Carrick. Ky i fundit kishte ndërmend t'i jepte mundësinë e debutimit me ekipin e parë gjatë sfidës së Kupës së Ligës kundër Brightonit, por pas sinjalizimeve për pakënaqësinë e lojtarit dhe dëshirën e tij për t'u larguar, talenti u la jashtë listës së grumbullimit. Mungesa e një kontrate profesionale përbën ngërçin kryesor për klubin nga Old Trafford. Meqenëse lojtarit i mungon një marrëveshje formale afatgjatë, Manchester United humbet të drejtën për të kërkuar një dëmshpërblim standard tregu në rast të një shitjeje të mundshme. Nëse 16-vjeçari vendos të vijojë karrierën jashtë vendit, në një skuadër evropiane, Unitedi do të mjaftohet vetëm me një shumë modeste prej rreth 350 mijë funtesh, e cila shërben thjesht si kompensim për shpenzimet e bëra në zhvillimin e tij. Megjithatë, skenari ndryshon rrënjësisht nëse talenti zgjedh një destinacion brenda Premier League. Sipas informacioneve të publikuara nga “The Guardian”, klubet angleze janë të detyruara të ulen në tavolinë për të negociuar me Manchester Unitedin, ku shuma e kompensimit mund të kapërcejë shifrën e tre milionë funteve, pa llogaritur këtu edhe mundësinë e vendosjes së një klauzole prej 20 për qind nga rishitja e ardhshme e kartonit. Në përpjekje e sipër për të shmangur këtë skenar negativ, drejtuesit e klubit i kanë paraqitur Gabrielit një ofertë për bursë zyrtare për sezonin e ardhshëm. Megjithatë, ky hap nuk përbën një garanci se adoleshenti do të pranojë të vazhdojë rrugëtimin e tij në qendrën stërvitore të klubit. Ndërkohë që e ardhmja e lojtarit mbetet tërësisht e hapur dhe e mbështjellë nga misteri, struktura drejtuese e Unitedit mbetet e angazhuar për të gjetur një gjuhë komunikimi, me qëllim që ta bindin talentin të hedhë rrënjë dhe të rritet më tej nën fanellën e tyre.