Berisha ashpër ndaj Ramës pas OKB-së: E quajti armik të Kosovës dhe përmendi heshtjen e tij për UÇK-në

Kryetari i Partisë Demokratike, Sali Berisha, gjatë një komunikimi virtual me qytetarët në rrjetet sociale, ka analizuar fjalimin e kryeministrit Edi Rama në Asamblenë e Përgjithshme të OKB-së. Lideri i opozitës e ka etiketuar këtë paraqitje si më skandalozen e shënuar ndonjëherë nga një zyrtar i lartë i shtetit shqiptar në arenën ndërkombëtare. Sipas Berishës, kreu i Qeverisë vendosi prioritet mbrojtjen personale nga skandalet e brendshme dhe frikën ndaj algoritmeve, duke shmangur çdo interes kombëtar. Ai vuri në dukje se gjatë fjalës së tij, Rama nuk e përmodhi asnjëherë Kosovën dhe as figurat kyçe të Ushtrisë Çlirimtare të Kosovës. Në vijim, Berisha solli në vëmendje një kontrast me qëndrimin e kryeministrit të Kroacisë në të njëjtën ngjarje, i cili haptazi ngriti zërin kundër politikave destabilizuese të Beogradit dhe lavdërimit të kriminelëve të luftës si Ratko Mlladiq, duke kritikuar mungesën totale të një guximi të ngjashëm nga ana e kryeministrit shqiptar. Më poshtë po sjellim deklaratën e plotë të kryetarit të Partisë Demokratike, Sali Berisha: “Fjala e Padrinos në Organizatën e Kombeve të Bashkuara ishte fjala më e turpshme që është mbajtur ndonjëherë pas fjalimeve të ministrave të jashtëm të Shqipërisë apo atyre të Koresë së Veriut. Nuk kemi pasur kurrë një përfaqësim kaq të turpshëm, ku kreu i narkoshtetit shqiptar, i fandaksur, i tmerruar nga protesta rinore, qytetare dhe skandalet e njëpasnjëshme, i kushtoi fjalën e tij algoritmit dhe tmerrit që ndjen nga algoritmi në Organizatën e Kombeve të Bashkuara. Në këtë fjalim, në atë sallë e cila jo rastësisht, por në një akt përçmimi madhor ishte bosh gjatë fjalës së tij, Edi Rama nuk shqiptoi një herë të vetme fjalën Kosovë dhe fjalën UÇK apo lider të UÇK-së. Tradhtia i ka zënë grykën. E ka mbërthyer për gryke dhe nuk e lejon më të shqiptojë një fjalë. Histori e turpshme. Në atë sallë, në një fjalim të shkëlqyer, kryeministri i vendit mik, Kroacisë, foli sikur të ishte kryeministri i Shqipërisë. Ai denoncoi veprimet e Beogradit, nderimet ushtarake që i bëhen monstrave të gjenocidit të Bosnjës, Ratko Mlladiç, përpjekjet destabilizuese të Beogradit në Kosovë dhe për probleme të tjera të rajonit. Kurse për Edi Ramën, universi i tij ishte algoritmi, që në fakt i ka kallur tmerrin dhe datën në çdo qelizë të tij. Por, me këtë rast, i ftoj edhe ata pak qytetarë të Kosovës që për jugosllavizmin e tyre, apo për të mbetur si relike, apo për enverizmin e tyre, vazhdojnë dhe bëjnë të mashtruarin nga Edi Rama.”