Tello: Lamine Yamal nuk do ta kishte të lehtë të siguronte një vend titullari te Barcelona e vitit 2012

Superstari i ri i Barcelonës, Lamine Yamal, vështirë se do të kishte arritur të siguronte një fanellë titullari në skuadrën katalanase të vitit 2012. Ky është mendimi i ish-anësorit të “Blaugranve”, Cristian Tello, i cili ka vënë në pah konkurrencën e frikshme dhe talentin e jashtëzakonshëm të sulmuesve që klubi kishte në atë periudhë. Në një intervistë dhënë për median spanjolle “Sport”, pas tërheqjes së tij përfundimtare nga futbolli i luajtur, Tello u pyet se si do të përshtatej Yamal nëse do të luante për Barcelonën e atyre viteve. Duke analizuar situatën, ish-futbollisti u përgjigj hapur: “Titullar? Nuk mendoj kështu. Do ta kishte pasur shumë të vështirë të arrinte deri aty. Mendoj se do të ishte ngritur në nivelin që ka sot dhe do të kishte treguar atë që tregon aktualisht, por do të kishte qenë e komplikuar”. Për të ilustruar këtë vështirësi, spanjolli përmendi emrat e mëdhenj që përbënin repartin ofensiv të atëhershëm: “Siç thashë, po flasim për Alexis Sanchez, Pedro, Villa, Messi dhe Neymar… Këta janë lojtarë të një niveli të jashtëzakonshëm dhe për çdo futbollist që vinte nga akademia do të ishte shumë e vështirë të gjente një vend mes tyre në ekipin e parë”. Nga këndvështrimi i një lojtari që ka dalë vetë nga akademi e famshme “La Masia”, sot talentet e rinj të moshave 16, 17 apo 18 vjeç e kanë rrugën shumë më të hapur për t'u bërë pjesë e formacionit kryesor. “Po, tani është diçka më e zakonshme. Ekipi i parë aktualisht përfshin një numër shumë të madh lojtarësh të rinj dhe për këtë arsye bëhet më e lehtë që këta futbollistë të depërtojnë”, përfundoi shpjegimin e tij Tello.