Kurti pret në takim ambasadorin italian Antonini: Diskutohet për integrimin evropian dhe zhvillimin e vendit

Kryeministri i Republikës së Kosovës, Albin Kurti, ka zhvilluar një takim zyrtar me ambasadorin e Italisë, Maurizio Antonini, me ç'rast ky i fundit i ka përcjellë urimet e tij për zgjedhjen e presidentes. Gjatë këtij takimi, vëmendja kryesore i kushtua përmbylljes së suksesshme të procesit të formimit dhe funksionalizimit të institucioneve shtetërore, duke u dakorduar për një fokus të plotë te agjenda e punës dhe projektet zhvillimore. Biseda u shtri gjithashtu në zhvillimet aktuale politike, ku u përmend aktgjykimi i 16 shtatorit në Hagë ndaj ish-krerëve të Ushtrisë Çlirimtare të Kosovës (UÇK). Pjesë e rëndësishme e diskutimit ishte edhe rrugëtimi i Kosovës drejt integrimit evropian, roli kyç i Italisë dhe domosdoshmëria e mbështetjes së saj për ngritjen e statusit të vendit tonë në vend kandidat për anëtarësim në Bashkimin Evropian. Kreu i ekzekutivit, Albin Kurti, shprehu falënderimet e tij të sinqerta për shtetin italian për ndihmën e deritanishme në zhvillimin e Kosovës, si dhe për angazhimin e tyre të vazhdueshëm në ruajtjen e paqes, sigurisë dhe stabilitetit si në nivel lokal ashtu edhe në atë rajonal. Në fund të takimit, u theksua vullneti i ndërsjellë për intensifikimin dhe zgjerimin e bashkëpunimit bilateral në të gjitha fushat me interes reciprok, duke përfshirë edhe sektorin e sportit.