Foltorja në Fier/ Fero: Synojmë ta kthejmë Partinë Demokratike në strehën e çdo qytetari që beson te liria

Partia Demokratike organizoi këtë të shtunë në qytetin e Fierit aktivitetin e njohur si Foltorja e 'Ripërtërijes', ku theksi u vendos te hapja e dyerve të kësaj force politike për të gjithë qytetarët. Gjatë fjalës së tij, drejtuesi i komanduar i degës së PD-së në Fier, Ardian Fero, u bëri thirrje intelektualëve dhe shtresës së re që të bëhen pjesë e strukturave opozitare, me qëllim sjelljen e ndryshimit të shumëpritur për një të ardhme më të mirë në vend. ‘Ne duhet të premtojmë se do të bëjmë gjithçka që kjo forcë politike të jetë përsëri një shtëpi, një shtëpi e hapur për çdo shqiptar që beson te liria, demokracia dhe dinjiteti’, u shpreh ndër të tjera Fero para të pranishmëve. Duke folur në cilësinë e studentit të Mjekësisë dhe atij të Dhjetorit, Fero vuri në dukje se ky takim shkon përtej përmasave të një tubimi të zakonshëm partiak. Ai ftoi qytetarët të reflektojnë mbi realitetin aktual ekonomik dhe social, duke ngritur pyetje mbi standardin e jetesës, mundësitë e të rinjve dhe gjendjen e përgjithshme nën atë që ai e cilësoi si sundim i narkoshtetit. Kreu i degës së PD-së Fier theksoi se rithemelimi i Shqipërisë kërkon fillimisht rithemelimin e vetë individit dhe strukturave politike. Ai vlerësoi kontributin e deritanishëm të demokratëve që sakrifikuan ndër vite, ndërsa bëri thirrje të hapur për rikthimin e atyre që janë larguar, angazhimin e të rinjve, grave, profesionistëve dhe intelektualëve. Në përmbyllje të fjalës së tij, përballë liderit historik të Partisë Demokratike, Sali Berisha, dhe qytetarëve fierakë, Fero theksoi se fokusi kryesor mbetet dëgjimi i zërit të qytetarëve, pranimi i kritikave dhe puna e përbashkët për t'i dhënë shpresë familjeve shqiptare dhe atyre që duhet të rikthehen në vendin e tyre.