Krerët e futbollit shqiptar, Duka dhe Ademi, marrin pjesë në samitin e UEFA-s në Berlin

Këtë të mërkurë, qyteti i Berlinit në Gjermani ka shërbyer si nikoqir i takimit të rëndësishëm të organizuar nga shtëpia evropiane e futbollit, UEFA Top Executive Programme (TEP). Në këtë ngjarje, e cila ka pasur në qendër të vëmendjes perspektivën dhe zhvillimin e lojës më të popullarizuar në kontinent, kanë marrë pjesë përfaqësues nga të 55 shtetet anëtare të këtij institucioni. Ndër pjesëmarrësit kanë qenë edhe drejtuesit e lartë të dy federatave tona, Armand Duka dhe Agim Ademi. Gjatë këtij samiti, ata i janë bashkuar konsensusit të përgjithshëm për t'i dhënë mbështetje të plotë kandidaturës së Aleksander Ceferin për një mandat tjetër në krye të UEFA-s. Përmes një postimi në rrjetet sociale, kreu i Federatës Shqiptare të Futbollit ka ndarë detaje nga ky takim, duke theksuar frymën e bashkëpunimit mes federatave. “Në Berlin, në takimin e UEFA Top Executive Programme (TEP), ku në fokus ishte e ardhmja e futbollit evropian. Një mesazh i fortë uniteti nga 55 federatat anëtare të UEFA-s, që mbështetën unanimisht Aleksander Ceferin për një mandat të fundit si President i UEFA-s, kërkesë që ai e pranoi. Bashkë për një futboll evropian më të fortë”, ka shkruar Duka.