Ministri Murati: Integriteti financiar është mburojë për buxhetin e shtetit dhe konkurrencën e ndershme

Ministria e Financave e Republikës së Kosovës ka pritur ngjarjen e Procesit të Berlinit, e cila u fokusua te financat e paligjshme, nën moton “Beyond Compliance – Ndërtimi i ekonomive të qëndrueshme përmes integritetit financiar”. Gjatë fjalës së tij hapëse, ministri i Financave, Hekuran Murati, shprehu mirënjohjen për Gjermaninë për ndihmën e vazhdueshme në kuadër të Procesit të Berlinit, duke e cilësuar këtë iniciativë si një ndër platformat më kuptimplota për integrimin dhe bashkëpunimin rajonal. “Kur dëgjojmë termin ‘financim i paligjshëm’, zakonisht vëmendja na shkon te krimi dhe aspektet e zbatimit të ligjit. Sigurisht që këto kanë rëndësinë e tyre, por unë dëshiroj ta trajtoj çështjen nga një këndvështrim tjetër, atë ekonomik, duke u ndalur te qytetarët dhe sipërmarrjet”, u shpreh Murati. Sipas kreut të financave, qarkullimi i parave të dyshimta dëmton rëndë tregun dhe shkatërron parimin e konkurrencës së lirë e të ndershme. “Kapitali i paligjshëm deformon tregun, favorizon shkelësit e rregullave, largon konkurrencën dhe zhduk të ardhurat e destinuara për buxhetin shtetëror, prej nga financohen shkollat, spitalet dhe infrastruktura rrugore”, deklaroi ai. Murati shtoi se angazhimi kundër qarkullimit të tillë monetar është i lidhur ngushtë me besimin e qytetarëve te shteti, respektimin e detyrimeve tatimore, ruajtjen e fondeve publike dhe thithjen e kapitalit të huaj. “Kjo nuk ka të bëjë vetëm me kapjen e fondeve të devijuara, por edhe me përmbushjen e detyrimeve tatimore, sigurinë e parasë publike, hapjen e ekonomisë dhe joshjen e investitorëve të huaj për të hapur vende të reja pune”, sqaroi ministri. Duke u ndalur te hapat konkretë që ka ndërmarrë ekzekutivi kosovar, ai veçoi uljen e pragjeve për transaksionet në para të gatshme mes bizneseve. “Kemi ngushtuar hapësirën e pagesave B2B nga 500 në 300 euro. Ndërkaq, për blerjet e konsumatorëve (B2C), tavani është vendosur në 2 mijë euro cash. Çdo transaksion tjetër është i detyruar të kalojë përmes kanaleve të rregullta të institucioneve financiare të autorizuara në vend”, theksoi Murati. Po ashtu, ai bëri të ditur se janë ndërmarrë hapa konkretë për mbikëqyrjen dhe pajisjen me licencë të subjekteve që operojnë në fushën e kriptomonedhave. “Kemi ecur para me kontrollin dhe licencimin e operatorëve të kriptomonedhave. Kjo lehtëson gjurmueshmërinë dhe transparencën e pagesave digjitale, duke mbështetur konkurrencën e ndershme dhe formalizimin e ekonomisë në hije”, u shpreh ai. Në vijim, ministri vuri në dukje se asnjë shtet i vetëm nuk mund t'ia dalë mbanë i izoluar përballë këtij fenomeni, pasi flukset e paligjshme kalojnë lehtësisht kufijtë shtetërorë. “Paratë e pista lëvizin lirshëm ndërkombëtarisht. Prandaj, bashkëpunimi rajonal, sidomos në Ballkanin Perëndimor, është i domosdoshëm, pasi ndajmë të njëjtat sfida dhe mund të mësojmë nga praktikat e mira apo gabimet e së kaluarës”, tha Murati. Ai gjithashtu vlerësoi lart domosdoshmërinë e koordinimit mes njësive të inteligjencës financiare, organeve të rendit, prokurorisë, komunitetit akademik dhe partnerëve ndërkombëtarë. “Ju ftoj të gjithëve për një diskutim të hapur e praktik, ku të krenohemi me arritjet tona, por edhe të flasim hapur për boshllëqet ekzistuese dhe punën që na pret përpara”, u bëri thirrje pjesëmarrësve ai. Në mbyllje të fjalës, ministri përsëriti se synimi kryesor mbetet ndërtimi i mekanizmave funksionalë për forcimin e integritetit financiar. “Në fund të ditës, integriteti financiar nuk është thjesht çështje burokratike e përputhshmërisë me rregullat, por është garanci për mbrojtjen e fondeve publike, sigurimin e barazisë në treg dhe ngritjen e një ekonomie që gëzon besimin e plotë të qytetarëve”, përfundoi Hekuran Murati.eks.