Miratimi i Reformës Territoriale, Rama: Vendi mori një hov të ri modernizimi pavarësisht kontestimeve

Kryeministri Edi Rama ka hedhur dritë mbi miratimin e Reformës Territoriale, vetëm pak orë pas votimit të saj në Kuvend, duke e vlerësuar këtë vendim si një moment kyç që i jep vendit një hov të ri drejt modernizimit. Përmes një postimi në rrjetin social X, kreu i ekzekutivit është ndalur te përplasjet politike vendase dhe ato që i quajti spekulime të ardhura nga jashtë. Ai argumentoi se, pavarësisht pengesave dhe kundërshtive gjatë këtij procesi, vendimi i parlamentit përbën një progres të dukshëm për Shqipërinë. Në të njëjtën kohë, Rama i ka dërguar një mesazh të qartë opozitës dhe aktorëve të tjerë, duke theksuar se ky proces dëshmoi edhe një herë vendosmërinë dhe forcën politike të Partisë Socialiste. “Përtej të gjithë debateve të brendshme, spekulimeve të jashtme dhe peripecive të një kohe të ngatërruar nga gjithfarë duarsh të pista, ca të dukshme e ca të padukshme po jo të pazbuluara tanimë, votimi i mbrëmshëm në Kuvend i dha Shqipërisë një tjetër shtysë modernizuese. Dhe nga ana tjetër, u tregoi edhe njëherë të gjithë atyre që e kishin të nevojshme, se nuk duhet të bëjnë asnjëherë ‘hesape pa hanxhinë’ me Partinë Socialiste”, u shpreh ndër të tjera kryeministri. Ky reagim nga ana e kreut të qeverisë pason seancën plenare ku Reforma Territoriale u votua me 85 pro dhe 34 kundër. Ndryshimet e reja parashikojnë një zvogëlim të hartës vendore të bashkive në vend, duke e çuar numrin e tyre nga 61 në 46, përmes procesit të shkrirjes së 15 njësive të qeverisjes vendore.