Mospajtime thelbësore mes Shkupit dhe Sofjes, Mucunski: Dialogu mbetet i hapur

Ministri i Punëve të Jashtme dhe Tregtisë së Jashtme, Timço Mucunski, gjatë vizitës së tij në Sofje në kuadër të një takimi ministror, ka zhvilluar një bisedë kokë më kokë me homologen e tij bullgare, Velislava Petrova Çamova. Në qendër të këtij takimi ishin marrëdhëniet bilaterale, rrugëtimi evropian i Maqedonisë, nevoja urgjente për të thyer akullin e mosbesimit përmes komunikimit të hapur, si dhe diskutimet rreth Planit të Veprimit për Minoritetet. Pas këtij takimi dypalësh, kryediplomati maqedonas zhvilloi gjithashtu një takim të ndarë me Komisioneren Evropiane për Zgjerim, Marta Kos, duke shkëmbyer mendime mbi sfidat aktuale të procesit eurointegrativ. Duke iu drejtuar mediave pas këtyre takimeve, Mucunski e cilësoi atmosferën e bisedës me ministren bullgare si konstruktive dhe pozitive, pavarësisht faktit se hendeku mes pozicioneve të të dyja shteteve për çështjet kyçe mbetet i konsiderueshëm. Megjithatë, të dyja palët u dakorduan që dialogu të vijojë rregullisht për çdo temë që paraqet interes të përbashkët. "Pozicionet e Maqedonisë dhe Bullgarisë sa i takon integrimit evropian vazhdojnë të jenë mjaft larg njëra-tjetrës, por takimi i sotëm me ministren e jashtme bullgare Velislava Petrova Çamova ishte konstruktiv dhe u zhvillua në një frymë pozitive. U pajtuam që komunikimi mes dy shteteve tona të mos ndalet për asnjë nga çështjet me interes të ndërsjellë", u shpreh Mucunski nga kryeqyteti bullgar. Sipas tij, ekziston një nivel i theksuar mosbesimi reciprok, veçanërisht kur bëhet fjalë për besueshmërinë dhe parashikueshmërinë e vetë procesit të integrimit evropian të Maqedonisë. "Për të qenë plotësisht i hapur dhe transparent, gjatë takimit nuk kemi arritur të zgjidhim asnjë nga çështjet thelbësore dhe nuk ka dilemë se qëndrimet tona mbesin të ndryshme. Megjithatë, biseduam në një frymë pozitive për mbarëvajtjen e dialogut në periudhën e ardhshme, i cili pa dyshim do të vazhdojë", përfundoi shefi i diplomonisë maqedonase.