Alarmi i Marco Rubio-s nga Lisbona: Lufta në Ukrainë rrezikon të kapërcejë kufijtë dhe të përfshijë rajonin

Sekretari Amerikan i Shtetit, Marco Rubio, ka lëshuar një paralajmërim të fortë lidhur me rrezikun e zgjerimit të agresionit rus në Ukrainë. Gjatë qëndrimit të tij në Lisbonë, kryediplomati amerikan theksoi se ngërçi aktual në fushëbetejë mund t'i shtyjë palët drejt lëvizjeve të skajshme, duke e shndërruar këtë përplasje në një konflikt të gjerë rajonal. Kjo deklaratë u bë gjatë ndalesës së fundit të një turi diplomatik që Rubio zhvilloi në tri vende anëtare të NATO-s: Islandë, Greqi dhe Portugali. Sipas tij, Uashingtoni zyrtar mbetet i bindur se përmbyllja e kësaj lufte kërkon një zgjidhje të negociuar në tavolinë, duke konfirmuar gatishmërinë e SHBA-së për të ndihmuar në lehtësimin e procesit diplomatik. Paralajmërimi i Rubio-s përkoi me një ditë të përgjakshme në Ukrainë, ku si pasojë e një sulmi rus mbi dy autobusë në qytetin e Kramatorskut humbën jetën të paktën 33 persona, sipas bilancit të konfirmuar nga autoritetet vendase. I pyetur mbi sigurinë e krahut lindor të Aleancës Veriatlantike dhe sulmet e vazhdueshme ruse, sekretari amerikan e përshkroi situatën si një "luftim jashtëzakonisht të rrezikshëm" që aktualisht ka ngecur. Ai sqaroi se konflikte të këtij lloji zakonisht gjejnë zgjidhje vetëm përmes dy rrugëve: bisedimeve diplomatike ose një përshkallëzimi të mëtutjeshëm ushtarak. Skenari i parë, sipas tij, kërkon kompromise të dhimbshme nga të dyja palët. Ndërkaq, skenari i dytë mbart rrezikun e madh ku si Rusia, ashtu edhe Ukraina, mund të ndërmarrin hapa agresivë për të ndryshuar raportin e forcave në terren. Rubio tërhoqi vëmendjen se ky përshkallëzim mund të manifestohet me akte sabotazhi në shtetet fqinje që janë anëtare të NATO-s, apo sulme të tjera që do të përhapnin me shpejtësi flakët e luftës. "Kjo mund ta kthejë shpejt një luftë dypalëshe në një përplasje rajonale shumë më të gjerë dhe tejet kërcënuese", u shpreh ai, duke shtuar se rruga më e shpejtë dhe më e mirë mbetet marrëveshja e negociuar, pasi nuk ka një zgjidhje të mirëfilltë ushtarake. Qëndrimin e SHBA-së për diplomaci e mbështeti edhe Ministri i Jashtëm i Portugalisë, Paulo Rangel. Ai nënvizoi se agresioni rus përbën shkelje të hapur të së drejtës ndërkombëtare dhe insistoi se çdo marrëveshje e ardhshme paqeje duhet të garantojë plotësisht sovranitetin e Ukrainës. Gjatë bisedës, Rubio preku edhe temën e ndjeshme të buxheteve ushtarake të NATO-s. Ai kërkoi që rritja e fondeve për ushtrinë të mos shihet thjesht si një "shpenzim", por si një investim jetik për mbrojtjen kolektive. Sipas tij, forcimi i kapaciteteve të secilit shtet anëtar rrit fuqinë parandaluese të të gjithë aleancës. "NATO-ja është e rëndësishme, por që ajo të ketë peshë, duhet të jetë e fortë", përfundoi Sekretari Amerikan i Shtetit, duke kujtuar se organizata mbetet në thelb një aleancë mbrojtëse.