Tragjedi në burgun e Sinaloas: Dhjetë të vrarë gjatë përleshjeve të përgjakshme, mes viktimave edhe një i mitur

Një valë e re dhune ka përfshirë shtetin e Sinaloas në Meksikë, ku të enjten një përleshje e armatosur brenda një institucioni korrektues la pas 10 viktima. Ngjarja e rëndë raportohet të jetë pasojë e konflikteve të brendshme të grupeve kriminale që operojnë në fushën e trafikut të drogës. Pas shpërthimit të dhunës, forca të shumta policore dhe ushtarake, të pajisura me armatim të rëndë dhe mjete mbrojtëse, ndërhynë brenda perimetrit të burgut për të vënë situatën nën kontroll. Në zonën përreth objektit, pamjet e pasqyruara tregonin praninë e automjeteve të blinduara dhe ambulancave, ndërsa familjarët e shqetësuar të të burgosurve ishin mbledhur para dyerve të burgut në qytetin turistik të Mazatlanit, në pritje të lajmeve për gjendjen e të afërmve të tyre. Sekretari i Sigurisë Publike në Sinaloa, Sinue Tejes, konfirmoi përmes një deklarate zyrtare se në mesin e 10 viktimave ndodhet edhe një i mitur, i cili ndodhej në ambientet e burgut për vizitë. Sipas zyrtarit, nga ky incident kanë mbetur të plagosur edhe 16 të burgosur të tjerë. Këto qendra paraburgimi shërbejnë shpesh si strehë për anëtarët e kartelit të Sinaloas, organizatë e cila është përfshirë në një përplasje të brendshme brutale, që ka shkaktuar mbi 1,000 viktima që nga fillimi i vitit 2024. Ky incident shënon rastin e dytë të dhunshëm brenda burgjeve të këtij shteti brenda këtij viti. Kujtojmë se më 31 maj, një ngjarje e ngjashme ndodhi në burgun e Culiacanit, kryeqytetit të shtetit, ku humbën jetën shtatë persona.