Moti për të premten: Priten rrebeshe shiu dhe shkarkesa rrufesh, temperaturat arrijnë deri në 23 gradë

Dita e premte pritet të nisë me paqëndrueshmëri atmosferike, ku në orët e para të ditës do të mbizotërojnë reshje lokale shiu, të shoqëruara nga shkarkesa elektrike. Fenomenet meteorologjike do të jenë më të theksuara në zonën e Rrafshit të Dukagjinit. Në vijim, dita do të karakterizohet nga një ndërthurje mes vranësirave të shpeshta dhe intervaleve me diell. Megjithatë, gjatë gjithë ditës mbetet prezent rreziku për rrebeshe shiu të izoluara, të cilat sërish do të jenë më të pranishme në pjesën e Dukagjinit, ku nuk do të mungojnë as shkarkesat e rrufeve. Lëvizja e ajrit do të jetë nga drejtime të ndryshme, me një intensitet që do të variojë nga 13 deri në 39 km/h. Sa i përket vlerave termike, temperaturat minimale do të shënojnë vlera ndërmjet 10 dhe 15 gradë Celsius, ndërsa temperaturat maksimale gjatë orëve të ditës parashikohet të lëkunden në intervalin prej 20 deri në 23 gradë Celsius.