Guximi i 60-vjeçares shqiptare: U përball me flakët në Zvicër për të shpëtuar banesën

Një situatë dramatike u regjistrua të mërkurën, më 7 tetor, në Rothrist të kantonit Aargau në Zvicër, ku një shtetase shqiptare u përball me një zjarr që përfshiu ballkonin e një ndërtese banimi dhe biznesi në rrugën Rubernstrasse. Pavarësisht rrezikut, 60-vjeçarja Shadije A. nuk qëndroi duarkryq, por ndërhyri menjëherë për të frenuar përhapjen e flakëve. Ngjarja ndodhi rreth mesditës, ndërsa tymi i dendur dhe zjarri ishin të dukshëm edhe nga distanca të largëta. Shadija, e cila ndodhej për vizitë te djali i saj, vuri re flakët pak minuta pasi kishte fikur një cigare në ballkon. Duke vepruar instinktivisht, ajo u përpoq ta shuante zjarrin me mjete rrethanore. „Kur pashë flakët, mora menjëherë kova dhe enë të mbushura me ujë për t'i shuar ato. Gjatë kësaj përpjekjeje, pësova lëndime në krahun e djathtë dhe në këmbë“, rrëfeu ajo. Pas ndërhyrjes, 60-vjeçarja u dërgua në spital për trajtim mjekësor, por fatmirësisht lëndimet nuk rezultuan serioze dhe ajo u lirua shpejt. Në këtë betejë me zjarrin, ajo nuk ishte e vetme. Disa punëtorë që ndodheshin pranë ndërtesës vunë re tymin dhe vrapuan për ndihmë. Një bashkatdhetar nga Kosova u angazhua në mënyrë aktive, duke përdorur jastëkët e ballkonit për të goditur flakët deri në shuarjen e tyre të plotë. Duke treguar modesti për veprimin e saj, Shadija theksoi: „Unë thjesht veprova. Jam mirënjohëse për ndihmën e tij dhe e lumtur që askush nuk humbi jetën“. Policia Kantonale e Aargaut konfirmoi se të gjithë banorët e ndërtesës arritën të largoheshin në kohë dhe pa lëndime të tjera. Autoritetet po hetojnë shkaqet e incidentit, ku dyshimi kryesor bie mbi mbetjet e një cigareje që mund të mos kenë qenë shuar siç duhet. Specialistët janë duke vijuar punën për të zbardhur plotësisht rrethanat e këtij rasti.