Homazh për komandantin Adem Shehu: Ministri Maqedonci rrëfen rrugëtimin e përbashkët për lirinë e Kosovës

Ministri i Mbrojtjes i Republikës së Kosovës, Ejup Maqedonci, ka marrë pjesë në Tiranë në premierën e dokumentarit “Në Shërbim të Betimit”, një vepër kushtuar jetës dhe kontributit të jashtëzakonshëm të komandantit Adem Shehu në përpjekjet për çlirimin e Kosovës. Duke e vlerësuar si një moment reflektimi të thellë, ministri Maqedonci theksoi se ky dokumentar nuk është thjesht një rrëfim biografik për një ushtarak, por një pasqyrë e një periudhe historike vendimtare për kombin shqiptar. Sipas tij, figura e Shehut mishëron përkushtimin ndaj atdheut dhe vendosmërinë për të luftuar për të drejtat e shqiptarëve. Sipas rrëfimit të ministrit, rruga e Adem Shehut për çështjen e Kosovës kishte nisur shumë përpara se ai të merrte përsipër përgatitjen e vullnetarëve të Ushtrisë Çlirimtare të Kosovës. Kthesa e madhe ndodhi gjatë vitit 1997, kur Shehu u takua me heroin Agron Rrahmani dhe veprimtarin e njohur e eprorin e UÇK-së, Fatmir Humolli, takime këto që shënuan fillimin e një pune intensive për trajnimin e luftëtarëve që vinin nga të gjitha trojet shqiptare drejt Shqipërisë. Ministri Maqedonci ndau edhe një kujtim personal, duke treguar se në mesin e marsit të vitit 1998, pikërisht në Tiranë, ai mori mësimet e para ushtarake nga Adem Shehu. Kjo përvojë shërbeu si pikënisje e rrugëtimit të tij ushtarak, ndërsa më vonë, kur Maqedonci komandonte Batalionin e Parë të Brigadës 153 “Hyzri Talla”, ata punuan krah për krah nën komandën e Shehut në Brigadën 153. Ai e përshkroi komandantin Shehu si një shembull të disiplinës, përgjegjësisë dhe atdhedashurisë. Në shenjë mirënjohjeje për kontributin e tij të çmuar, ministri Maqedonci vlerësoi lart dekorimin e Adem Shehut me “Urdhrin e Lirisë” nga Presidentja e Kosovës gjatë këtij qershori. Në mbyllje të fjalës së tij, ai falënderoi autorët e dokumentarit, duke theksuar se dokumentimi i historisë është një obligim moral ndaj dëshmorëve dhe brezave të rinj, për të ruajtur të gjallë vlerat e lirisë dhe bashkimit kombëtar.