E ardhmja e Haaland në pikëpyetje: A po e pret Spanja yllin e Manchester Cityt?

E ardhmja e Erling Haaland është kthyer sërish në qendër të spekulimeve, sidomos në dritën e problemeve ligjore që mund të përballet Manchester City për shkak të shkeljeve financiare. Nëse klubi anglez ndëshkohet rëndë, një largim i norvegjezit nga stadiumi 'Etihad' bëhet një skenar gjithnjë e më i mundshëm. Pavarësisht zhurmës mediatike, sulmuesi po kalon një formë spektakolare, duke realizuar shtatë gola në gjashtë paraqitjet e tij të para për këtë sezon. Megjithatë, hijet mbi fatin e klubit kanë nxitur interesimin e gjigantëve spanjollë, Real Madrid dhe Barcelona, të cilët prej kohësh e kanë vëzhguar me kujdes fenomenin norvegjez. Eksperti i njohur i tregut të transferimeve, Fabrizio Romano, nuk e ka përjashtuar mundësinë që Haaland të provojë një aventurë në La Liga. Sipas tij, një kalim në Spanjë nuk do të ishte aspak befasues, duke kujtuar se të dyja klubet spanjolle kishin shfaqur interesim për lojtarin që kur ai ishte pjesë e Borussia Dortmundit. Megjithatë, Romano ka dashur të qetësojë gjakrat, duke sqaruar se për momentin nuk ka asnjë negociatë apo kontakt konkret për një transferim të afërt. Ai theksoi se Haaland mbetet një profesionist shembullor, i cili gëzon një kontratë afatgjatë me Manchester Cityn dhe tregon respekt maksimal për klubin e tij aktual. Nga ana e tij, vetë futbollisti ka zgjedhur të mos ndikohet nga zërat e merkatos. Në një prononcim për kanalet zyrtare të klubit, Haaland ka kërkuar përqendrim maksimal te fusha e blertë. "Duhet të ruajmë pozitivitetin, të shohim përpara dhe të fokusohemi te fitimi i ndeshjeve," deklaroi norvegjezi, duke dëshmuar se është i përkushtuar ndaj objektivave të skuadrës së tij.